इटहरी : इटहरी–१४ स्थित श्री शान्ति सिर्जना माध्यमिक विद्यालयका प्रधानाध्यापक कमल तिम्सिनाले झण्डै ८० लाख रुपैयाँ घोटालाको आरोप लागेपछि करिब एक वर्षसम्म पदमा रहँदै अन्ततः राजीनामा दिएका छन्।
उनले ‘स्वास्थ्य कारण’ देखाउँदै राजीनामा दिएका हुन्।
आर्थिक वर्ष २०७९।८० मा शिक्षक तलब शीर्षकमा इटहरी उपमहानगरले उक्त विद्यालयलाई पठाउनु पर्ने ८ लाख ७३ हजारको सट्टा ७८ लाख ६३ हजार रुपैयाँ बढी भुक्तानी दिएको थियो।
आर्थिक वर्ष २०७९।८० मा शिक्षकको तलब शीर्षकको बजेटमा इटहरी उपमहानगरले विद्यालयलाई ८ लाख ७३ हजार ६८३ रुपैयाँ रकम भुक्तानी गर्नुपर्ने थियो। तर उपमहानगरबाट ७८ लाख ६३ हजार रुपैयाँ बढी भुक्तानी भयो।
८,७३,६८३ रुपैयाँ निकासा हुनुपर्नेमा एउटा ६ बढी थिचिएका कारण सो रकम बढी गएको उपमहानगरले दाबी गर्दै आएको छ।
विद्यालयको खाता २२२०१००००१३९६०१ नम्बरमा संघीय सरकारको बजेटबाट उक्त रकम जम्मा भएको थियो। इटहरीका ३६ वटै सामुदायिक विद्यालयलाई उपमहानगरले २०७९ असोज ५ गते राष्ट्रिय वाणिज्य बैँकको खातामार्फत कुल ६ करोड ३० लाख ६१ हजार ६६० रुपैयाँ जम्मा गरेको थियो।
जसमध्ये शान्ति विद्यालयलाई ८ लाख ७३ हजार ६८३ रुपैयाँ रकम उपलब्ध गराउनुपर्ने थियो। उपमहानगरबाट भने ७८ लाख ६३ हजार बढी रकम भुक्तानी भयो।
७८ लाख रुपैयाँ सरकारी रकमको चरम दुरुपयोग गरेको २२ महिनासम्म न उपमहानगरले सोधपुछ गर्यो, न त प्रधानाध्यापक तिम्सिनाले जानकारी गराए।
तर, आन्तरिक लेखा परीक्षणमार्फत सो रकम घोटाला भएको खुलेपछि समाचार बाहिरियो। तर, कारबाहीको सट्टा, उपमहानगरका कर्मचारी र जनप्रतिनिधिको संरक्षणमा तिम्सिनाले आफ्नो पद जोगाइरहे।
राजनीतिक आड र शक्ति प्रदर्शन
तिम्सिना नेकपा एकीकृत निकट प्रगतिशील राष्ट्रिय शिक्षक संगठनमा आबद्ध छन् । उनी शिक्षक महासंघको केन्द्रीय सदस्यसमेत हुन्।
शिक्षक नेताका रूपमा परिचित तिम्सिनाले स्वास्थ्य कारण देखाएर दिएको राजीनामा आइतबार (साउन ११ गते) मात्रै सार्वजनिक भएको हो। ‘मेरो स्वास्थ्यको कारणले गर्दा यही मिति २०८२।०४।०१ गतेदेखि लागू हुनेगरी प्रधानाध्यापक पदबाट राजीनामा दिएको छु,’ उनले पत्रमा उल्लेख गरेका छन्।
असार ३२ गते राजीनामा दिएपनि साउन ७ गते मात्रै विद्यालय व्यवस्थापन समितिको बैठक बसेर राजीनामा स्वीकृत गरेको हो।
रकम घोटाला गरेपछि तिम्सिनो सबै पैसा हर्जनासहित बुझाएको भन्दै उनलाई उपमहानगरले उन्मुक्ति दिइएको थियो
०८१ साउन ७ र १४ गते दुई किस्तामा ७–७ लाख र साउन ३० गते ६४ लाख ६५ हजार तथा ७ लाख ८६ हजार रुपैयाँ उपमहानगरलाई फिर्ता गरिएको हो। फिर्ता गरेकै भरमा उनलाई कारबाही नहुने निर्णय गरियो । जुन घोटालालाई वैधानिकता दिने प्रयासजस्तो देखिने जानकारहरू बताउँछन्।
यसअघि विद्यालय व्यवस्थापन समितिले उनलाई पदमुक्त गरे पनि तिम्सिनाले उच्च अदालत विराटनगरबाट अन्तरिम आदेश ल्याएर पुनः पदमा फर्किएका थिए। तर, पछिल्लो पटक अदालतले रिट खारेज गरेपछि उनले राजीनामा दिएका हुन्।
राजीनामा स्वीकृत भएपछि अहिले सुस्मिता नेपाललाई निमित्त प्रअ तोकिएको छ । स्थायी नियुक्तिका लागि उपमहानगरसँग समन्वय भइरहेको विद्यालय व्यवस्थापन समितिका अध्यक्ष रम्तुल मियाँले जनाए।
‘बैठकबाट प्रअ तिम्सिनाकाे राजीनामा स्वीकृत गरी इटहरी उपमहानगरलाई पत्र पठाइसकिएको छ,’ मियाँले भने, ‘अहिले नयाँ प्रअ नियुक्त भइसक्नुभएको छैन, अब इटहरी उपमहानगरसँग समन्वय गरी प्रअ नियुक्त हुन्छ।’
Discussion about this post