विराटनगर : कोशी प्रदेश सरकारले आधिकारिक पत्राचार, कागजात र सरकारी सञ्चारमा कोशी प्रदेश सरकार, विराटनगर नेपाल लेखिने निर्णय गरेको छ।
शुक्रबार बसेको मन्त्रिपरिषद्को बैठकले प्रदेशको नाम प्रचलनमा स्पष्टता ल्याउने उद्देश्यले यो निर्णय गरेको हो।
यसअघि “प्रदेश सरकार, कोशी प्रदेश, विराटनगर” भन्ने ढाँचा प्रयोगमा रहँदै आएकोमा अबदेखि त्यसको सट्टा “कोशी प्रदेश सरकार, विराटनगर नेपाल” लेख्नुपर्नेछ।
निर्णयबारे जानकारी दिँदै प्रदेश सरकारका प्रवक्ता तथा आन्तरिक मामिला तथा कानुन मन्त्री रेवतिरमण भण्डारीले यसलाई अनिवार्य रूपमा लागू गरिने बताए।
मन्त्रिपरिषद्ले प्रदेश सरकारी सेवामा कार्यरत अस्थायी दरबन्दीमा रहेका कर्मचारीहरूको दरबन्दी स्वीकृति दिने निर्णय पनि गरेको छ।
यो निर्णयले लामो समयदेखि करारमा कार्यरत कर्मचारीहरूको अवस्था प्रष्ट पार्ने विश्वास गरिएको छ।
सरकारले प्रदेशको सरकारी कामकाजमा प्रयोग हुने भाषासम्बन्धी विधेयक तयार गरी प्रदेश सभामा पेश गर्ने निर्णयसमेत गरेको छ।
मन्त्री भण्डारीका अनुसार विधेयक पारित भएपछि लिम्बु भाषा र मैथिली भाषालाई पनि सरकारी कामकाजको भाषा बनाउने बाटो खुल्नेछ। “यसले प्रदेशको बहुभाषिक पहिचानलाई संस्थागत गर्न सहयोग पुर्याउने विश्वास लिएको छ,” उनले बताए।
त्यस्तै, कोशी प्रदेशको तथ्यांक व्यवस्थापनसम्बन्धी विधेयकलाई प्रदेश मामिला समितिबाट परिमार्जन गरी प्रदेश सभामा पेश गर्ने निर्णय गरिएको छ। साथै, प्रदेश स्वास्थ्य नीति २०८२ लाई स्वीकृति दिइएको छ।
शैक्षिक परामर्श तथा भाषा कक्षा सञ्चालनसम्बन्धी अर्को विधेयक पनि प्रदेश मामिला समितिमा पठाउने निर्णय भएको मन्त्री भण्डारीले जानकारी दिए।
भिडियो
Discussion about this post