इटहरी : कोशी टप्पु वन्यजन्तु आरक्षमा मंगलबार विश्व हात्ती दिवस मनाइएको छ। आरक्षको हात्तीसारमा खीर, फलफूल र उखुजस्ता परिकार खुवाइँदै स्थानीय र पर्यटकलाई हात्ती संरक्षणको सन्देश दिइएको हो।
सन् २०१२ देखि हरेक वर्ष अगस्ट १२ मा मनाइने यो दिवसको उद्देश्य हात्तीको अस्तित्व, महत्व र संरक्षणमा ध्यान केन्द्रित गर्नु हो।
कार्यक्रम राष्ट्रिय प्रकृति संरक्षण कोष, कोशी संरक्षण केन्द्र र कोशी टप्पु वन्यजन्तु आरक्ष कार्यालयको आयोजनामा सम्पन्न भएको हो।
राष्ट्रिय प्रकृति संरक्षण कोषका प्रमुख वीरेन्द्र गौतमका अनुसार हात्तीको धार्मिक, सांस्कृतिक र वातावरणीय महत्वबारे सचेतना बढाउन दिवस मनाइएको हो।
उनका अनुसार आरक्षमा रहेका हात्ती अवलोकनका लागि कोशी र मधेश प्रदेशका साथै भारतबाट पनि पर्यटक आउने गरेका छन्।
आरक्षका रेञ्जर अंकित पौडेलले हाल आरक्षमा १० हात्ती रहेको जानकारी दिए।
मध्यवर्ती क्षेत्र व्यवस्थापन समितिका अध्यक्ष जंगबहादुर खड्काले स्थानीयमा हात्ती संरक्षणबारे चेतना बढेपनि खेतबाली तथा सम्पत्तिमा हुने क्षति न्यूनिकरणका लागि अझै एकजुट प्रयास आवश्यक रहेको बताए।
सन् २००० देखि हालसम्म हात्तीको आक्रमणबाट ३४५ जनाको मृत्यु भएको छ भने करेन्ट तथा अन्य कारणले ५५ हात्ती मरेका छन्। पछिल्लो १२ वर्षमा कोशी क्षेत्रमा मात्रै ११ हात्ती मृत भेटिएका छन्।
गौतमका अनुसार पछिल्ला वर्षमा धेरै हात्तीको मृत्यु करेन्टका कारण भएको छ। उनले हात्तीको व्यवहारबारे सचेतना अभावका कारण मानव–हात्ती द्वन्द्व बढेको बताए।
अभियन्ताहरूले हात्ती संरक्षणलाई जैविक विविधता, सांस्कृतिक सम्पदा र पर्यावरणीय सन्तुलनका लागि अपरिहार्य मानेका छन्।
सबै तस्बिरहरू : वीरेन्द्र गौतम । राष्ट्रिय प्रकृति संरक्षण कोष कोशी ।
Discussion about this post