विराटनगर : पूर्वराष्ट्रपति विद्यादेवी भण्डारीले आफू नेकपा (एमाले)सँग जोडिएकी कार्यकर्ता नै भएको जिकिर गरेकी छन्।
सोमबार विराटनगर विमानस्थलमा सञ्चारकर्मीहरूसँग कुरा गर्दै उनले आफ्नो ४५ वर्ष लामो एमालेसँगको आबद्धता स्मरण गर्दै पार्टीको नीति–कार्यक्रमअनुसार अघि बढ्ने प्रतिबद्धता जनाइन्।
‘म नेकपा एमाले नै हो। म एमाले भएरै राष्ट्रपतिमा निर्वाचित भएको हुँ। म एमालेको कार्यकर्ता हुँ,’ भण्डारीले भनिन्।
उनले राजतन्त्र र गणतन्त्रबीचको भिन्नता केलाउँदै राष्ट्रपति पद आवधिक हुने र कार्यकाल सकिएपछि जुनसुकै नागरिक पनि सामान्य सामाजिक वा राजनीतिक जीवनमा फर्कन सक्ने धारणा राखिन्।
पार्टीभित्रको भूमिकाबारे प्रश्नमा उनले आफूलाई औपचारिक जानकारी नभएको जनाइन्। ‘पार्टीको औपचारिक कुरा के छ, मलाई थाहा छैन। सबै सदस्यलाई सबै कुरा थाहा हुँदैन। कमिटीमा बस्नेहरूलाई थाहा होला,’ उनले भनिन्।
आफ्नो आलोचना र व्यक्तिगत आरोपका विषयमा उनले आफू आलोचनाभन्दा मुक्त नरहेको बताइन् । ‘आलोचनाभन्दा मुक्त कोही पनि हुँदैन। मलाई गुट चलाउन आउँदैन,’ भण्डारीले भनिन्।
मदन भण्डारी फाउन्डेसनबारे उठेका प्रश्नमा उनले टिप्पणी नगरी पार्टी नेताहरूलाई सोध्नसमेत उनले आग्रह गरिन्।
Discussion about this post