विराटनगरको गुरुकुलमा प्रख्यात उपन्यास ‘एक चिहान’ मञ्चन हुँदै

विराटनगर : आरोहण गुरुकुल विराटनगरमा बुधबारदेखि एक चिहान नाटक मञ्चन हुने भएको छ ।

प्रसिद्ध लेखक हृदयचन्द्र सिंह प्रधानद्वारा लिखित मनोसामाजिक उपन्यास ‘एक चिहान’लाई नाट्य रूपान्तरणसहित भाद्र ११ गते बुधबारदेखि गुरुकुलको सुशीला कोइराला नाटकघरमा मञ्चन गरिने भएको हो ।

माध्यमिक शिक्षा परिषद्ले अनिवार्य नेपाली पाठ्यक्रममा समावेश गरेको सो उपन्यासलाई अध्ययन, अध्यापनमा सहजता आउने गरी मञ्चन गर्न लागिएको हो ।

विराटनगर आसपासका विद्यार्थी तथा नव–कलाकारहरूको खोजी गर्दै नाट्य अभिनय कार्यशालासहित पूर्वाभ्यास गरिएको नाटकलाई भाद्र महिनाभरी नियमित प्रदर्शन गर्ने योजना रहेको नाटक संयोजक देवेन्द्र यादवले जानकारी दिए ।

प्रजातन्त्र प्राप्तिपछि मौलाउँदै गएको प्रगतिशील सोचको परिवेश, सांस्कृतिक सम्मिश्रण, समावेशी र समानताका लागि आवश्यक परेको तथ्य, रुढीवादी र अन्धविश्वासले नेपाली समाजलाई नछाडेको वास्तविकता नाटकभित्र अनुकूल घटनाक्रम र स्वाभाविक पात्रको परिवेशबाट व्यक्त गरिएको छ ।

समय फेरिएतापनि भोगाई र अवस्थामा भएको समानताले नाटकलाई व्यापक बनाउँदै करिब सात दशक अघिको नेपाली समाजका विविध घटनाक्रम तथा निम्नवर्गिय नेपालीहरुले भोग्नुपरेको समस्याहरूलाई यथार्थपरक रूपमा नाटकमा प्रस्तुत गरिएको छ ।

नाटकमा समग्र विषयवस्तुहरूलाई कलात्मक तथा मनोरञ्नात्मक हिसाबले प्रस्तुत गरिएको छ । समाजले नारीलाई हेर्ने दृष्टिकोण, जातीय विभेदजस्ता विषयवस्तुमा व्यंग्यात्मक शैलीमा नाटक एक चिहानको कथावस्तुमा प्रस्तुत गरिएको छ ।

नाटकमा अष्टनारानको भूमिकामा महेश पासवान, लतमायाको भूमिकामा संगीता यादव, शिवनारानको भूमिकामा उद्धव सापकोटा, हाकुमायाको भूमिकामा दीक्षा चौधरी, पुननारनको भूमिकामा गौरव खतिवडा, सिन्तलीको भूमिकामा उपासना राई, हर्षनारानको भूमिकामा शिवराज भुजेल, रामबहादुको भूमिकामा भरत कार्की, डाक्टर गोदत्तप्रसादको भूमिकामा प्रदीप दाहाल, रञ्जनादेवीको भूमिकामा अमिशा वाग्ले, रत्नमानको भूमिकामा सागर घिमिरे, सूरमान सुब्बाको भूमिकामा निशान चौहान राई र नानीथंकुको भूमिकामा दिव्याङ्का खड्काको अभिनय रहनेछ ।

केही कलाकारहरूले दोहोरो पात्रको अभिनयसमेत गरेका छन् ।

सास्थम कलेज विराटनगरको प्रवद्र्धन तथा बगैंचा र विराट किचनको सहयोगमा प्रदर्शन हुने नाटकमा आवरण चित्रको रूपमा कलाकार राजन काफ्लेको चित्रकला, कवि रमेशचन्द्र अधिकारीको पाश्र्व आवाज, भरत कार्कीको प्रकाश परिकल्पना, विकास पराजुलीको मञ्च परिकल्पनासहित नाटकको परिकल्पना तथा निर्देशन दिपेश भण्डारीले गरेका छन् ।

आसपासका विद्यार्थी, विद्यालय तथा अन्य सरोकारवालाहरूका लागि नाटकको मञ्चन आवश्यकता अनुसार व्यवस्थापन गर्दै नाटकलाई प्रदर्शनमा ल्याइने आरोहण गुरुकुलका अध्यक्ष भैरव क्षेत्रीले जानकारी दिए ।