इटहरी : कोशी प्रदेशका उद्योग, कृषि तथा सहकारी मन्त्री खगेनसिं हाङ्गामले सचिव शरणकुमार पाण्डे चढेको गाडीको चाबी खोसेको विषयमा प्रस्टीकरण दिएका छन्।
बुधबार ताप्लेजुङ पुगेका मन्त्री हाङ्गामले सञ्चारकर्मीहरूसँग कुरा गर्दै उक्त विषयमा प्रष्ट्याएका हुन्।
उनले भने, “पाण्डे सिंहदरबारस्थित कृषि तथा पशुपन्छी विकास मन्त्रालयमा सहसचिवका रूपमा सरुवा भइसकेका छन्। सरुवा भएपछि पनि उहाँ मुख्यमन्त्री कार्यालयमा रहँदा हाम्रो मन्त्रालयको गाडी, चालक र क्वाटर प्रयोग गर्दै आउनु भएको थियो। मसँग भेट नभएको पनि २०–२५ दिन भइसकेको छ, मन्त्रालयमा सचिवका रूपमा खटिनु भएको छैन।”
उनले गाडीको चाबी बुझाउने कार्य आफूले व्यक्तिगत पूर्वाग्रहका आधारमा नभई सुशासन र जवाफदेहिताको दृष्टिले गरेको दाबी गरे।
“भोलि पत्रकार वा सर्वसाधारणले सोध्दा जवाफ दिनुपर्ने भएकाले मन्त्रालय मातहतका गाडी, चालक र क्वाटरको व्यवस्थापन गर्ने जिम्मेवारीअनुसार चाबी जिन्सी शाखामा बुझाएर मन्त्रालय परिसरमै गाडी राखिएको हो,” मन्त्री हाङ्गामले स्पष्ट पारे।
उनका अनुसार मन्त्रालयमा सेवाको चुस्त, दुरुस्त व्यवस्थापनका लागि निर्देशन दिने काम निरन्तर भइरहेको र कर्मचारीसँग व्यक्तिगत पूर्वाग्रह नरहेको बताए।
Discussion about this post