इटहरी : जेन–जी आन्दोलनका क्रममा भएको तोडफोड र आगजनीबाट इटहरी उपमहानगरपालिकाका नगर बस जोगिएका छन् ।
उपमहानगरपालिकाका मेसिनरी औजार व्यवस्थापन शाखा प्रमुख गणेश भट्टराईका अनुसार इटहरीमा रहेका चारवटै नगर बसहरू सुरक्षित छन् ।
उनका अनुसार भदौ २३ गते आन्दोलन चर्किँदा ती बस तालतलैया रोडस्थित ग्यारेजभित्रै रहेका थिए ।
‘सो दिन बिहान केही घण्टा सडकमा बस सञ्चालन भएपनि दिउँसो ११ बजेदेखि २ बजेसम्म चार्जका लागि रेस्टमा राखिएका थिए,’ भट्टराईले भने, ‘त्यही बेला प्रदर्शन भएपछि बस फेरि सडकमा सञ्चालन हुन सकेन ।’
खासगरी भदौ २३ गते प्रदर्शनकारीले उपमहानगरको पुरानो भवनभित्रका जिन्सी तथा राजस्व शाखामा तोडफोड गरेका थिए ।
साथै, मेयर हेमकर्ण पौडेलको कार्यकक्ष पनि आगजनी गरिएको थियो । मेयर पौडेलको कार्यकक्षसँगै जिन्सी र राजस्व शाखामा आगजनी गर्दा ठूलो क्षति भएको थियो ।
भोलिपल्ट २४ गते भने आन्दोलन दोहोरिन सक्ने अनुमान गरिएको थिएन । तर, बस भने सञ्चालन भएन ।
‘ग्यारेजभित्र रहेका नगर बसलाई भने कुनै क्षति पुगेन,’ भट्टराईले थपे, ‘भोलिपल्ट आन्दोलन हुने अनुमान नगरिएपनि बिहानै नगर बसलाई सशस्त्रको सुरक्षामा राखियो, जसले गर्दा क्षति हुन पाएन ।’ २४ गते बिहान भने सावधानी अपनाउँदै सशस्त्र प्रहरी बल १ नं. बाहिनी पकलीमा राखिएको थियो ।
सो दिन आगजनीका कारण इटहरी उपमहानगरको बारुण यन्त्र (दमकल)सहित थुप्रै सवारी साधनमा आगजनी गरियो । जसले उपमहानगरमा हाल कति क्षति भयो भन्नेबारे यकिन तथ्यांक संकलन गर्न कठिन भएको छ । यद्यपि, क्षतिको मूल्यांकन भने सुरु गरिएको छ ।
हाल नगर बस सञ्चालनबारे कुनै निर्णय नभएकाले गाडी सञ्चालनमा ल्याइएको छैन । ‘पालिकाले सरोकारवालासँग बसेर निर्णय गरेपछि मात्र फेरि सञ्चालनमा आउनेछ,’ उनले भने ।
उपमहानगरपालिकाले सर्वसाधारण नागरिकलाई सहज, सुरक्षित, र सुलभ सार्वजनिक यातायात सेवा प्रदान गर्ने उद्देश्यले अघिल्लो असोज २ गतेदेखि विद्युतीय नगर बस सेवा सुरु गरेको थियो ।
सडक सञ्जाल विस्तार भए पनि इटहरीका सबै क्षेत्रमा सार्वजनिक यातायात नियमित रूपमा उपलब्ध नभएको अवस्थामा, नगरपालिकाले यस कदमलाई नागरिकहरूको यात्रालाई सुविधाजनक बनाउने प्रयासको रूपमा लिएको जनाएको थियो ।
नागरिकलाई सहुलियतपूर्ण ढंगमा सेवा उपलब्ध गराउन बसको सेवा शुल्क २० रुपैयाँ तोकिएको थियो ।
गत असोज १ गते विश्वकर्मा पूजा गरेर २ गतेदेखि बिहान ७ बजेबाट ११ बजेसम्म र दिउँसो २ बजेदेखि बेलुकी ७ बजेसम्म नियमित रूपमा बस सञ्चालन गरिदैँ आएको थियो ।
धरान–विराटनगर सडकमा तरहरादेखि वडा नं. १३ को अरिहन्त मल्टिफाइवर्ससम्म, पूर्व–पश्चिम सडकमा बूढी खोला (मिलन चोक) देखि लगुना चोक बिजुली अफिससम्म बस सञ्चालन हुँदै आएको छ ।
यसैगरी इटहरीबाट साथी पेट्रोल पम्पदेखि, वडा नं. १० टावर हुँदै वडा नं. ११ खेतीपुल, नहरको बाटो हुँदै इटहरी, इटहरीबाट तरहरा, भवानीपुर, कान्छी चोक, पकली हुँदै इटहरी, इटहरीबाट तालतलैया, त्रिभुवन चोक, देवीस्थान हुँदै पुनः त्रिभुवन चोकसम्म बस सञ्चालन हुँदै आएको छ ।
यसैगरी हवाई चोक, आँपगाछी हुँदै इटहरी, इटहरीबाट लविपुर, वडा नं. १६, वडा नं. १५ को चाँदवेला सीमाना हुँदै वडा नं. १७ कार्यालय र कान्छी चोक हुँदै इटहरी बस सेवा सञ्चालन हुँदै आएको थियो ।
उपमहानगरपालिकाले नगर बस सञ्चालन गरेसँगै नागरिकहरूको दैनिक यात्रा थप सहज र सुविधाजनक बनाउने विश्वास गरिएपनि नगर बस खरिद प्रकरणलाई लिएर आर्थिक अनियमितता भएको आरोपसमेत लागेको थियो । चार वटा नगर बसलाई ६ करोड भन्दा बढी रकम खर्च गरिएको भन्दै उक्त विषय विवादरहित बन्न सकेको थिएन ।
यद्यपि, जेन–जी आन्दोलनका क्रममा नगरका भौतिक संरचना र सरकारी सवारी साधनमा व्यापक क्षति पुगे पनि नगर बस जोगिनु इटहरीकावासीका लागि राहतको समाचार बनेको छ ।
इटहरीवासी नागरिकले नगर बसलाई केवल सार्वजनिक यातायातको वैकल्पिक साधन मात्र नभई आधुनिक, सुरक्षित र व्यवस्थित शहरी यातायातको प्रारम्भिक आधारका रूपमा हेर्ने गरेका छन् । न्यून शुल्कमा सहज यात्राको सुविधा पाएपछि विद्यार्थी, श्रमिकदेखि ज्येष्ठ नागरिकसम्मले यस सेवामा अपेक्षा राखेका थिए ।
अधिकांश नागरिकले नगर बसका कारण निजी सवारी साधन, खासगरी सिटी सफारीको प्रयोग घट्ने, सहरमा ट्राफिक जाम कम हुनेमा समेत मद्दत पुग्ने विश्वास व्यक्त गर्दै आएका छन् ।
स्थानीयका अनुसार पालिकाले पारदर्शी ढंगले सञ्चालन गरे इटहरीलाई स्मार्ट सहरतर्फ लैजाने लक्ष्यमा नगर बसले ठोस योगदान पु¥याउने बताउँदै आएका छन् ।
Discussion about this post