इटहरी : झापाको शिवसताक्षी नगरपालिका–१० माईधारका ३२ वर्षीय सरोज शर्माको अपहरणपछि हत्या गरिएको प्रहरीले आशंका गरेको छ।
एक साताअघि कारसहित बेपत्ता भएका शर्माको शनिबार (आज) बिहान झापा गाउँपालिका–५ स्थित बिरिङ खोलाको पुलमुनि गाडिएको अवस्थामा मृत फेला परेका हुन्।
स्थानीयले पुल आसपास दुर्गन्ध फैलिएको देखेपछि प्रहरीलाई खबर गरेका थिए।
अनुसन्धानका लागि खाल्डो खनिँदा कालो प्लाष्टिकमा बेरिएको शव फेला परेको प्रहरीको भनाइ छ। शवको पहिचान नागरिकता र आफन्तको सनाखतबाट गरिएको हो।
प्रहरीका अनुसार हत्या प्रकरणमा शर्माकै गाउँका केही युवाहरू संलग्न रहेको खुल्न आएको छ। प्रहरीले शंकास्पद दुई जनालाई नियन्त्रणमा लिएर अनुसन्धान थालेको छ।
पक्राउ परेकामध्ये एक जना मोटरसाइकल चोरी र लागूऔषध कारोबारमा मुद्दा खेपिसकेको व्यक्ति भएको स्रोतले जनाएको छ।
जिल्ला प्रहरी कार्यालय झापाका प्रवक्ता डीएसपी खगेन्द्रकुमार खड्काले घटनाबारे विस्तृत अनुसन्धान भइरहेको बताए।
“शव पत्ता लाग्नेबित्तिकै परिवारलाई बोलाएर सनाखत गराइयो। अपहरणपछि हत्या भएको प्राथमिक अनुसन्धानमा देखिएको छ,” डीएसपी खड्काले भने ।
शर्माले चलाइरहेको बा ३० च ७१९४ नम्बरको कार कात्तिक १२ गते मेचीनगर–१३ हातेमालो सामुदायिक वनभित्र जलाइएको अवस्थामा फेला परेको थियो।
अपहरणपछि शर्माको हत्या भएको भन्दै हत्यामा संलग्नको तत्काल पहिचान गरेर पक्राउ गरी सार्वजनिक गर्न स्थानीयले माग गरेका छन् ।
Discussion about this post