इटहरी : धरानमा पाटे बाघ फेला परेको खबर फैलिएको थियो, तर वास्तविकता फरक भएको छ ।
मंगलबार साँझ करिब ७ः३० बजे धरान उपमहानगरपालिका–१४ हात्तीसार क्षेत्रमा स्थानीय युवाहरूले निगाले बाघको एक बच्चा फेला पारेका छन् ।
धरान–१६ का १८ वर्षीय युसन राई, १८ वर्षीय सिमन राई, र धरान–१३ का १७ वर्षीय अमन लिम्बूले उक्त जनावर फेला पारी प्रहरीलाई बुझाएका थिए ।
इलाका प्रहरी कार्यालय धरानका डीएसपी भीषणबाबु राईका अनुसार स्थानीयले बाटोमा अलमलिएको अवस्थामा जनावर नियन्त्रणमा लिएर प्रहरीमा बुझाएका थिए ।
‘स्थानीयले नियन्त्रणमा लिएर प्रहरीमा बुझाएपछि हामीले राति नै वन कार्यालयलाई बुझाएका हौँ,’ उनले भने, ‘यो बाघ नै हो भन्ने अनुमान गरिएको थियो ।’
स्थानीयले ‘पाटे बाघको बच्चा फेला पर्यो’ भन्नेबारे छलफल गरेपनि वन रक्षक लालबहादुर श्रेष्ठले उक्त जनावर निगाले बाघ रहेको पुष्टि गरे ।
‘यो बिरालो परिवारकै जनावर हो । बाघजस्तो देखिन्छ तर आकारमा सानो हुन्छ । यो खासगरी सुनसरीको रामधुनी क्षेत्र वरिपरि पाइने प्रजाति हो, सम्भवतः त्यहाँबाट डुल्दै धरानसम्म आएको हो,’ उनले भने ।
उनका अनुसार फेला परेको जनावर पोथी निगाले बाघको बच्चा हो । जसको तौल करिब डेढ किलो छ ।
‘संरक्षणका लागि यो बाघलाई निकुञ्जमा पठाउने कि वन क्षेत्रमा छाड्ने भन्नेबारे अहिले छलफल भइरहेको छ,’ उनले थपे ।
निगाले बाघ नेपालमा पाइने वन्यजन्तु संरक्षण ऐन, २०२९ अन्तर्गत सूचीकृत संरक्षित जनावर हो । यो प्रजाति बाघभन्दा सानो भए पनि बनोट र चालढालका कारण धेरैले ‘पाटे बाघ’ भन्ने गरेका छन् ।
Discussion about this post