इटहरी : नेकपा (माओवादी केन्द्र) कोशी प्रदेश संसदीय दलका नेता इन्द्रबहादुर आङ्बोले प्रयोग गर्दै आएको सरकारी गाडीले बिहीबार एक जनाको ज्यान लिएको छ।
प्रदेशसभा सचिवालयले प्रमुख प्रतिपक्षी दलको नेताको हैसियतमा उपलब्ध गराएको को १ झ ६५० नम्बरको स्कारपिओ गाडीले बाटो क्रस गर्दै गरेको को ९ प ७९ नम्बरको मोटरसाइकललाई ठक्कर दिँदा ३५ वर्षीय प्रवेश चौधरीको मृत्यु भएको हो। दुर्घटना मोरङको ग्रामथान–५ मा भएको हो।
प्रहरीका अनुसार गाडी आङ्बोका आफन्तलाई लिन जाँदै गर्दा तीव्र गतिमा मोटरसाइकललाई ठक्कर दिएको प्रारम्भिक अनुसन्धानले देखाएको छ।
दुर्घटनामा संलग्न चालक पाँचथरको फाल्गुनन्द गाउँपालिका–१ का गम्भीरमान सार्कीलाई नियन्त्रणमा लिएर इलाका प्रहरी कार्यालय बेलबारीले अनुसन्धान अघि बढाएको छ।
घाइते चौधरीलाई विराटनगरस्थित विराट नर्सिङ होममा उपचारका क्रममा दिउँसो ३ः१५ बजे चिकित्सकले मृत घोषित गरेका थिए।
स्थानीयहरूले गाडीको गति अत्यधिक रहेको र नियन्त्रण गुमाएर ठक्कर दिएको बताएका छन्।
माओवादी नेता आङ्बो हाल कोशी प्रदेश प्रमुख प्रतिपक्षी दलका नेता हुन्।
Discussion about this post