विराटनगर : पशु क्वारेन्टाइन कार्यालय विराटनगरले २०८२।८३ को पहिलो त्रैमासिकको अवधिमा प्रथम त्रैमासिक अवधिको निर्धारित कार्यहरूको ८३.३७ प्रतिशत काम सम्पन्न भएको जनाएको छ ।
कार्यहरूको ४७.५५ प्रतिशत वित्तिय प्रगति हासिल गरेको कार्यालय प्रमुख डा. विदुर प्रसाद गौतमले जानकारी दिए ।
सीमा क्षेत्रमा अवैध पशुजन्य सामग्री नियन्त्रणमा केन्द्रित गतिविधि प्रभावकारी रूपमा कार्यान्वयन गरिएको उनको भनाइ छ ।
कार्यालयले विराटनगरको रानी, सुनसरीको भण्टाबारी, सिरहाको माडर नाकाबाट हुने आयात–निर्यातलाई नियमित निगरानी र कडाइका साथ जाँच गरिएको जनाएको छ ।
अवैध रूपमा भित्रिने जोखिमयुक्त पशु तथा पशुजन्य सामग्री रोकथाम, स्वास्थ्य परीक्षण, क्वारेन्टाइन प्रमाणपत्र जारी गर्ने कार्यलाई प्राथमिकतामा राख्दै कार्यालयले आयातकर्ता तथा निर्यातकर्ता उद्योगसँग नियमित समन्वय गरिरहेको जनाएको छ ।
प्रतिवेदनअनुसार अवैध सामग्री नष्ट गर्ने अभियान यस त्रैमासिकमा झनै सशक्त रूपमा अघि बढाइएको छ । कार्यालयका टोलीले पहिलो त्रैमासिकमा ३२ पटक अनुगमन गरी ठूलो परिमाणका अवैध पशुजन्य सामग्री नियन्त्रणमा लिएर नष्ट गरेको छ ।
नष्ट गरिएका सामग्रीमध्ये २४० केजी ब्रोलर कुखुरा ,३२९ वटा बोइलर कुखुरा , सेतो अण्डा २९ क्रेट, पहिचान नखुलेको आलो मासु १०४ केजी, प्याकेज सि फिस ३० केजी, एकुरियम माछा १० पिस, फ्रोजन फिस ७३५ केजी, माछाको सिद्रा २० केजी नष्ट गरेको छ ।
भारत–नेपाल सीमाबाट भित्रिने पशुचौपायाको स्वास्थ्य परीक्षण, संक्रमण जोखिम रोकथाम तथा सवारीसाधन स्यानिटाइजेसन नियमित रूपमा भइरहेको उल्लेख गरिएको छ ।
साथै, सो अवधिमा आयातित कच्चा पदार्थको गुणस्तर जाँचका लागि नमुना संकलन गरी प्रयोगशाला परीक्षण पनि गरिएको छ ।
कार्यालयले सीमा क्षेत्रमा अवैध सामग्री नियन्त्रणका लागि स्थानीय प्रशासन र सुरक्षासम्बन्धी निकायसँग समन्वय निरन्तर भैरहेको छ ।
Discussion about this post