इटहरी : पूर्व प्रधानमन्त्री स्वर्गीय कृष्णप्रसाद भट्टराईको स्मृतिमा इटहरीमा हुँदै आएको गोल्डकप अन्तर्गत तेस्रो संस्करणको अन्तर्राष्ट्रिय गोल्डकप प्रतियोगिता आगामी फागुन २ गतेदेखि हुने भएको छ ।
प्रतियोगिता फागुन ९ गतेसम्म चल्नेछ ।
आयोजक द योङ ब्रदर्श क्लब इटहरीले शनिबार पत्रकार सम्मेलन गरी अघिल्ला दुईवटा संस्करण प्रदेशस्तरीय भएतापनि यसपटकदेखि भने अन्तर्राष्ट्रियस्तरको गर्ने क्लबका संरक्षक विकास केसीले बताए ।
उनका अनुसार प्रतियोगिता गर्नुको मुख्य कारण खेलाडी उत्पादन रहेको छ ।
खासगरी पछिल्लो समय इटहरीमा फुटबल खेलाडीहरूको अभाव भएको महसुस गरिएकाले खेलाडी उत्पादन गर्नु मुख्य उद्देश्य रहेको केसीले बताए ।
इटहरीबाट फुटबल खेलाउँदा पछिल्लो समय अन्यतिरबाट खेलाडी बटुलेर ल्याउनुपर्ने बाध्यता छ ।
यस्तो बाध्यताको अन्त्य गरी इटहरीका नयाँ पुस्तालाई ऊर्जा थपेर खेलकुदप्रति आकर्षित गर्न खेलकुद गतिविधि सञ्चालन गर्न लागिएको उनले प्रष्ट्याए ।
खेलमा भारतसहित नेपालका नाम चलेका आठ वटाको टिमको सहभागिता रहनेछ । केही टिमसँग नाम फाइनल गर्न बाँकी रहेको जानकारी दिइयो ।
अन्तर्राष्ट्रियस्तरको प्रतियोगितामा रुपान्तरण भएसँगै विजेता टिमलाई चार लाख चार हजार रुपैयाँ नगद प्रदान गरिने भएको छ । यस्तै, उपविजेता टिमलाई दुई लाख दुई हजार दुई सय प्रदान गरिनेछ ।
खेलमा प्रत्येक दिनको म्यान अफ दि म्याचलाई जनही सात हजार रुपैयाँ प्रदान गरिनेछ ।
यस्तै, सर्वोत्कृष्ट खेलाडीलाई २० हजार रुपैयाँ प्रदान गरिनेछ । खेलमा उत्कृष्ट गोलरक्षक, डिफेण्डर, मिड फिल्डर, स्ट्राइकर र सर्वाधिक गोलकर्तालाई जनही १३/१३ हजार रुपैयाँ प्रदान गरिनेछ ।
खेलकुदका लागि ३० लाखभन्दा बढी खर्च हुने पत्रकार सम्मेलनमा जानकारी दिइयो ।
प्रतिस्पर्धाका लागि इटहरी उपमहानगरपालिकाको संयोजन र कोशी प्रदेश खेलकुद विकास बोर्ड संरक्षक रहनेछ । पत्रकार सम्मेलनकै क्रममा खेलाडीहरूलाई जर्सी वितरण समेत गरिएको थियो ।
Discussion about this post