इटहरी : सुनसरीका निजी विद्यालय सञ्चालकहरूले इटहरी उपमहानगरपालिकाका मेयर हेमकर्ण पौडेलले जेन-जी आन्दोलनसँग जोडेर आफूमाथि लगाइएका आरोपलाई राजनीतिक अभिप्रेरणाबाट प्रेरित र तथ्यविहीन भएको बताएका छन्।
उनीहरूले यस्ता अभिव्यक्तिले शैक्षिक क्षेत्रको गरिमा र विश्वसनीयतामाथि गम्भीर प्रश्न उठाएको जनाएका छन्।
उच्च शिक्षालय तथा माध्यमिक विद्यालय संघ (हिसान)सुनसरीले बुधबार इटहरीमा आयोजित पत्रकार भेटघाटमा बोल्दै विद्यालय प्रतिनिधिहरूले नगरप्रमुख पौडेलले सार्वजनिक रूपमा व्यक्त गरेका भनाइहरू प्रमाणविनै आरोप लगाउने प्रवृत्तिको उदाहरण भएको टिप्पणी गरे।
उनीहरूका अनुसार आन्दोलनको संवेदनशील समयमा जिम्मेवार पदमा रहेका व्यक्तिबाट आउने यस्ता अभिव्यक्तिले समाजमा भ्रम फैलाउने काम गरेको छ।
देशभर फैलिएको आन्दोलनलाई इटहरी केन्द्रित देखाएर निजी विद्यालयलाई दोषी देखाउने प्रयास पूर्वाग्रही र एकपक्षीय भएको उनीहरूको भनाइ छ।
विद्यालय सञ्चालकहरूले आन्दोलनका क्रममा भएको तोडफोड र आगजनीसँग शैक्षिक संस्थाको कुनै संस्थागत संलग्नता नरहेको दाबी गर्दै, विद्यार्थीलाई हिंसात्मक गतिविधिमा पठाइएको भन्ने आरोप अस्वीकार गरे।
हिसान सुनसरीका अध्यक्ष सागर भट्टराईका अनुसार कोही, कसैप्रति हिंसा र तोडफोड स्वीकार्य हुन नसक्ने र त्यसमा विद्यालयले कहिल्यै प्रोत्साहन नगर्ने बताए। उनका अनुसार विद्यार्थीको सुरक्षा र अनुशासन विद्यालयको पहिलो दायित्व हो।
पत्रकार सम्मेलनमा निजी विद्यालय सञ्चालकहरूले नगरप्रमुखलाई भावनात्मक आरोपभन्दा माथि उठेर तथ्य र प्रमाणका आधारमा कुरा गर्न आग्रह गरे।
प्रमाणविनै लगाइने आरोप तत्काल रोक्नुपर्ने उनको माग थियो। साथै, यस्ता अभिव्यक्तिले शिक्षक, अभिभावक र विद्यार्थीबीच अविश्वासको वातावरण सिर्जना गर्ने खतरा रहेको उनीहरूले औँल्याए।
Discussion about this post