आगामी फागुन २१ गते हुने प्रतिनिधिसभा निर्वाचनमा बदर मतको संख्या घटाउने दबाबबीच निर्वाचन आयोगले देशभरका ६ हजार ७४३ वडामा एक–एक जना मतदाता शिक्षा स्वयंसेवक परिचालन गर्ने भएको छ।
आयोगका अनुसार फागुन ३ देखि १७ गतेसम्म सञ्चालन हुने कार्यक्रमअन्तर्गत स्वयंसेवकले घरदैलो पुगेर नमूना मतपत्रमार्फत मतदान प्रक्रिया, गोप्य मतदान र निर्वाचन आचारसंहिताबारे जानकारी दिनेछन्।
यसअघि भएका निर्वाचनमा बदर मत उच्च देखिएपछि आयोगले मतदाता शिक्षालाई प्राथमिकतामा राखेको हो।
निर्वाचन आयोगले स्थानीय तहका सम्पर्क व्यक्तिलाई यसपटक मतदाता शिक्षा कार्यक्रमको अनुगमनकर्ताका रूपमा तोकेको छ भने स्वयंसेवक र अनुगमनकर्तालाई माघको अन्तिमसम्म तालिम तथा अभिमुखीकरण दिइने जनाएको छ।
आयोगले आमसञ्चार माध्यम र सामाजिक सञ्जालमार्फत समेत निर्वाचन सामग्री प्रचारप्रसार तीव्र पारेको छ।
गलत र भ्रामक सूचनाबाट मतदातालाई जोगाउँदै मतदान सहभागिता बढाउनु कार्यक्रमको मुख्य लक्ष्य रहेको आयोगले जनाएको छ।
Discussion about this post