इटहरी : कोशी प्रदेश प्रहरी कार्यालय विराटनगरले जिल्ला प्रहरी कार्यालय ओखलढुंगाका प्रहरी नायव उपरीक्षक (डीएसपी) मदन केसीलाई माघ महिनाको “सर्वोत्कृष्ट प्रहरी” घोषित गरेको छ।
विभागीय मूल्य–मान्यता तथा आदेश–निर्देशनको पालना गर्दै उच्च मनोबल र साहसका साथ आफ्नो पदीय कर्तव्य निर्वाह गरेको भन्दै उनलाई उक्त सम्मान प्रदान गरिएको प्रदेश प्रहरी कार्यालयले जनाएको छ।
डीएसपी केसीको नेतृत्वमा ओखलढुंगाको चिशंखुगढी गाउँपालिका–६ भदौरे बोहोरेका ७४ वर्षीय चन्द्र बिक्रम राई र ८० वर्षीया चन्द्र माया राईको हत्या तथा लुटपाट घटनाको सफल अनुसन्धान गरिएको थियो।
गत माघ १३ गते अज्ञात व्यक्तिले कोदालो प्रहार गरी दुवै जनाको हत्या गरी सुनका गरगहना र नगद लुटी फरार भएको उक्त घटनामा संलग्न दुई जनालाई प्रहरीले काठमाडौं महानगरपालिका–१५ बाट लुटेको सामानसहित माघ २३ गते पक्राउ गरेको थियो।
यसैगरी, २०६७ असार २४ गते ओखलढुंगाको भदौरे गाविस–२ का ४३ वर्षीय छविलाल कार्कीको हत्या गरी फरार रहेका प्रतिवादीलाई १५ वर्षपछि २०८२ माघ १७ गते पक्राउ गर्न प्रहरीले सफलता हासिल गरेको थियो।
त्यस्तै, गत मंसिर २८ गते ओखलढुंगाको खिजिदेम्बा गाउँपालिका–९ मा एक महिलामाथि जबरजस्ती करणी गरी फरार रहेका २७ वर्षीय प्रतिवादीलाई समेत माघ ४ गते पक्राउ गरी कानुनी दायरामा ल्याइएको थियो।
उक्त घटनाहरूको सफल अनुसन्धान तथा फरार प्रतिवादी पक्राउ गरी शान्ति–सुरक्षाको अनुभूति दिलाउन उत्कृष्ट भूमिका खेलेको मूल्याङ्कन गर्दै डीएसपी केसीलाई माघ महिनाको ‘सर्वोत्कृष्ट प्रहरी’ घोषणा गरिएको प्रदेश प्रहरी कार्यालयले जनाएको छ।
Discussion about this post