मोरङ : प्रतिनिधिसभा सदस्यका लागि मोरङमा उम्मेदवारी दिएका ११० जनामध्ये आधाभन्दा कम उम्मेदवारले मात्र निर्वाचन खर्चका लागि बैंक खाता खोलेका छन्।
प्रदेश निर्वाचन कार्यालय विराटनगरका अनुसार निर्वाचन बैंक खाता खोल्न ८५ जनाले सिफारिस लिए पनि शनिबारसम्म ५० जनाले मात्रै खाता सञ्चालनमा ल्याएका छन् भने ६० जना अझै प्रक्रियाबाहिर रहेका छन्।
मोरङका प्रमुख कोष नियन्त्रक तोमनाथ उप्रेतीका अनुसार उम्मेदवारको आर्थिक कारोबार अनुगमनका लागि कोष नियन्त्रक कार्यालयलाई जिम्मेवारी दिइएको छ। उनले बैंक खाता नखोली निर्वाचन खर्च गर्न नमिल्ने भन्दै बाँकी उम्मेदवारलाई फोनमार्फत पनि सचेत गराइरहेको बताए।
उनका अनुसार केही स्वतन्त्र तथा दलका उम्मेदवारले ‘खर्च नगर्ने’ भन्दै खाता नखोल्ने संकेत दिएका छन्। तर सोमबारसम्म अनिवार्य रूपमा खाता सञ्चालनमा ल्याउन निर्देशन दिइएको छ।
निर्वाचन आयोग ऐन, २०७३ अनुसार जारी आचारसंहिताको दफा १६ ले उम्मेदवारले निर्वाचनसम्बन्धी सबै खर्च छुट्टै बैंक खातामार्फत गर्नुपर्ने व्यवस्था गरेको छ। खर्चको विवरण परिणाम घोषणा भएको ३५ दिनभित्र सम्बन्धित निर्वाचन कार्यालयमा बुझाउनुपर्ने कानुनी प्रावधान छ।
Discussion about this post