झापा : प्रतिनिधिसभा सदस्य निर्वाचन नजिकिँदै जाँदा भारतसँग सीमा जोडिएको झापाको दसगजा क्षेत्रमा सुरक्षा व्यवस्था उच्च सतर्कतामा राखिएको छ।
मेचीनगर, भद्रपुर र गौरीगञ्ज आसपासका सीमा नाकामा नेपाली सेनासहित नेपाल प्रहरी, सशस्त्र प्रहरी बल र अन्य सुरक्षाकर्मीको उपस्थिति बढाइएको छ।
प्रमुख जिल्ला अधिकारी शिवराम गेलालका अनुसार नेपाल–भारत सीमा क्षेत्रमा चौबीसै घण्टा निगरानी, सघन चेकजाँच र आवागमनमा कडाइ गरिएको छ।
निर्वाचन अवधिमा अवाञ्छित गतिविधि हुन नदिन सुरक्षा रणनीति कडा पारिएको उनले बताए।
निर्वाचनलाई लक्षित गर्दै सोमबार राति १२ बजेदेखि बिहीबार राति १२ बजेसम्म झापासँग जोडिएका सबै अन्तर्राष्ट्रिय सीमा नाका बन्द रहने प्रशासनले जनाएको छ।
तीन दिनसम्म सीमा बन्द गर्ने निर्णय भारतीय पक्षसँग समन्वय गरी गरिएको हो।
झापा जिल्ला भारतको पश्चिम बंगालस्थित दार्जिलिङ र बिहारको किशनगञ्ज जिल्लासँग सीमा जोडिएको संवेदनशील क्षेत्र हो।
एम्बुलेन्सलगायत अत्यावश्यक सेवा भने सुरक्षाकर्मीको अनुमति लिएर सञ्चालन गर्न पाइने व्यवस्था गरिएको छ।
निर्वाचनको निष्पक्षता र शान्ति सुरक्षालाई ध्यानमा राख्दै सीमा क्षेत्रमा उच्च सतर्कता अपनाइएको प्रशासनले जनाएको छ।
Discussion about this post