इटहरी : इटहरीमा जारी तेस्रो स्व. कृष्ण प्रसाद भट्टराई स्मृति गोल्डकप फुटबल प्रतियोगिता अन्तर्गत दोस्रो क्वाटरफाइनल खेलमा उदयपुरको बसाहा क्लबले सुनसरीको न्यू स्टार क्लब बराहक्षेत्रलाई ट्राइब्रेकरमा पराजित गर्दै सेमिफाइनलमा पुगेको छ।
निर्धारित समयमा दुवै टोलीले २–२ गोलको बराबरी खेलेपछि खेलको निर्णय ट्राइब्रेकरमार्फत गरिएको थियो। ट्राइब्रेकरमा बसाहा क्लबले ४–३ गोलले जित हात पार्दै अन्तिम चारमा प्रवेश गरेको हो।
खेलमा न्यू स्टार क्लबका नितेश लिम्बूले ९ र ५९ औँ मिनेटमा गोल गर्दै टोलीलाई अग्रता दिलाएका थिए। बसाहा क्लबका रितेश तामाङले ५७ औँ मिनेटमा तथा अनिश बस्नेतले ७६ औँ मिनेटमा गोल गर्दै खेल बराबरीमा ल्याएका थिए।
ट्राइब्रेकरमा बसाहा क्लबका रितेश तामाङ, विवेक चौधरी, आयुष राई र पवन मगरले गोल गरेका थिए।
न्यू स्टार क्लबका सन्दीप श्रेष्ठ, नितेश लिम्बू र भीम बिकले गोल गरे पनि शुसान्त तामाङ र उमेश कार्की गोल गर्न असफल भएपछि बसाहा क्लब विजयी भएको हो।
खेलको प्लेयर अफ द म्याच बसाहा क्लबका गोलरक्षक सन्दीप भट्टराई घोषित भए।
उनले महत्वपूर्ण दुई गोल रक्षा गर्दै टोलीलाई जित दिलाउन योगदान पुर्याए। उनलाई नगद ५ हजार ५ सय रुपैयाँसहित मेडल प्रदान गरिएको थियो।
द योङ ब्रदर्श क्लब इटहरीको आयोजनामा सुरु भएको प्रतियोगिताको विजेता टिमले नगद चार लाख चार हजार रुपैयाँ नगद प्रदान गरिने भएको छ । यस्तै, उपविजेता टिमलाई दुई लाख दुई हजार दुई सयमा चित्त बुझाउनेछ ।
खेलमा प्रत्येक दिनको म्यान अफ दि म्याचसँगै सर्वोत्कृष्ट खेलाडी, उत्कृष्ट गोलरक्षक, उत्कृष्ट डिफेण्डर, उत्कृष्ट मिड फिल्डर, उत्कृष्ट स्ट्राइकर र सर्वाधिक गोलकर्तालाई नगद रकम प्रदान गरिने आयोजकले जनाएको छ ।
Discussion about this post