इटहरी : कोशी प्रदेशको प्रमुख व्यापारिक तथा शहरी केन्द्रका रूपमा विकसित हुँदै गएको इटहरीमा पछिल्ला वर्षहरूमा आगलागीका घटना बारम्बार दोहोरिन थालेका छन्।
जनघनत्वको तीव्र वृद्धि, अव्यवस्थित विद्युतीय संरचना, तथा सावधानीको कमीका कारण सामान्य आगलागीसमेत ठूला दुर्घटनामा परिणत हुने गरेको सरोकारवालाहरू बताउँछन्।
विशेषगरी गत भदौ २४ गते जेनजी आन्दोलनका क्रममा भएको आगजनीले इटहरी उपमहानगरपालिकाको दमकल सेवा नै ठप्प बनाएको छ। आन्दोलनका क्रममा नगरपालिकाका दुवै दमकलमा आगजनी हुँदा ती पूर्ण रूपमा नष्ट भएका थिए।
त्यसयता नगर क्षेत्रमा आगलागी हुँदा तत्काल नियन्त्रणका लागि पर्याप्त साधनस्रोतको अभाव झेल्नुपरेको छ। छिमेकी स्थानीय तहबाट दमकल मगाउनुपर्ने बाध्यताका कारण घटनास्थलमा पुग्न ढिलाइ हुने र क्षति बढ्ने समस्या देखिएको छ।
यसै सन्दर्भमा इटहरी उपमहानगरपालिकाका प्रवक्ता तथा वडा नम्बर ६ का अध्यक्ष दिवस पोखरेलले दमकल खरिद प्रक्रिया अगाडि बढिसकेको जानकारी दिए। उनका अनुसार नगरले नयाँ दमकल खरिदका लागि आवश्यक प्रक्रिया सुरु गरिसकेको छ। चाँडै सेवा पुनः सञ्चालनमा ल्याउने लक्ष्य राखिएको उनले बताए।
‘यसअघि नै दमकल खरिद प्रक्रिया अगाडि बढिसकेको छ,’ उनले टाकुरा न्यूजसँग भने, ‘अब चाँडै नयाँ दमकल ल्याएर सेवा प्रभावकारी बनाउने तयारीमा छौं।’
पोखरेलका अनुसार विगतमा नगरसँग दुईवटा दमकल रहेका भए पनि आन्दोलनका क्रममा दुवै काम नलाग्ने अवस्थामा पुगेका छन्। अहिले एउटा दमकल छिट्टै खरिद गरी सेवा सुचारु गर्ने र आगामी दिनमा थप स्रोत व्यवस्थापन गर्ने योजना रहेको उनले बताए।
इटहरीमा हुने अधिकांश आगलागीका घटनामा विद्युत् मुख्य कारणका रूपमा देखिएको नगरपालिकाको तथ्यांकले देखाउँछ। कमजोर तथा पुराना विद्युतीय तार, अनियमित विद्युत् आपूर्ति (लाइन आउने–जाने समस्या), तथा विद्युतीय उपकरणको असावधानीपूर्ण प्रयोगले आगलागीका घटना बढाएको प्रवक्ता पोखरेलको भनाइ छ।
‘उपकरण चलिरहेको अवस्थामा वा लाइन आउने–जाने हुँदा सर्ट भएर आगलागी हुने गरेको छ,’ उनले भने, ‘होटलका किचनबाट पनि पटक–पटक आगलागीका घटना भएका छन्। आगोजस्तो संवेदनशील विषयमा सबै नागरिक सचेत र जिम्मेवार हुन जरुरी छ।’
उनले विशेषगरी पुराना तथा कमसल तारको प्रयोग नगर्न, विद्युतीय उपकरण प्रयोग गर्दा सावधानी अपनाउन, तथा घर तथा व्यवसायिक स्थलमा आधारभूत सुरक्षा उपाय अपनाउन आग्रह गरे। साथै, ग्यास सिलिन्डर, किचन सामग्री तथा ज्वलनशील पदार्थको सुरक्षित प्रयोगमा ध्यान दिनुपर्ने उनले बताए।
पहिला चैत–वैशाखको सुख्खा मौसममा हावाहुरीका कारण खुला आगोबाट आगलागी हुने गरेको भए पनि अहिले समयसँगै जोखिमको स्वरूप बदलिएको छ। अहिले शहरीकरणसँगै विद्युत् र प्रविधिमा निर्भरता बढेकाले आगलागीका कारण पनि परिवर्तन भएको उनले उल्लेख गरे।
स्थानीयवासीहरू भने दमकल अभावका कारण जोखिम बढेको भन्दै चिन्तित छन्। उनीहरूले चाँडै दमकल सेवा पुनः सञ्चालनमा ल्याउन नगरपालिकासँग माग गरेका छन्। व्यवसायीहरूले पनि बजार क्षेत्रमा आगलागी भए ठूलो आर्थिक क्षति हुने भएकाले पूर्वतयारीमा जोड दिनुपर्ने बताएका छन्।
इटहरीमा बढ्दो आगलागी जोखिम नियन्त्रणका लागि दमकल खरिद मात्र पर्याप्त नहुने सरोकारवालाहरूको भनाइ छ।
दीर्घकालीन रूपमा सुरक्षित विद्युतीय संरचना, जनचेतना अभिवृद्धि, नियमित अनुगमन, तथा आपतकालीन पूर्वतयारी आवश्यक देखिएको छ।
उपमहानगरले यी पक्षमा समेत ध्यान दिन सके मात्रै इटहरीलाई सुरक्षित र व्यवस्थित सहरका रूपमा विकास गर्न सकिने जानकारहरू बताउँछन्।
यो पनि – इटहरीमा बर्सेनि आगलागी, जेनजी आन्दोलनमा दमकल जलाइएपछि झनै चुनौती
Discussion about this post