इटहरी : इटहरी उपमहानगरपालिका–१३ काली मन्दिर नजिक कोशी लोकमार्गमा मोटरसाइकल दुर्घटना भएको छ।
दुहवीबाट इटहरीतर्फ आउँदै गरेको प्र १–०२–०४८ प ७९३८ नम्बरको मोटरसाइकल आफैँ अनियन्त्रित भई सडकको बीच डिभाइडरमा ठोक्किँदा दुर्घटना भएको प्रहरीले जनाएको छ।
दुर्घटनामा मोटरसाइकल पछाडि सवार दुहवी नगरपालिका–९ बस्ने २२ वर्षीय विपिन चौधरी गम्भीर घाइते भएका थिए।
उनको टाउकोमा गम्भीर चोट लागेको अवस्थामा उपचारका लागि विराट मेडिकल कलेज टिचिङ अस्पताल, बूढीगंगा मोरङ पठाइएको थियो। गम्भीर घाइते चौधरीको उपचारका क्रममा मृत्यु भएको प्रहरीले जनाएको छ।
यस्तै, मोटरसाइकल चालक सोही स्थानका २२ वर्षीय विप्लप चौधरी सामान्य घाइते भएका छन्। उनको दाहिने हात र बायाँ खुट्टामा चोट लागेको बताइएको छ।
प्रहरीका अनुसार मोटरसाइकल तीव्र गतिमा रहेको कारण दुर्घटना भएको प्रारम्भिक अनुमान गरिएको छ।
Discussion about this post