झापा : बिर्तामोडमा आयोजना हुन लागेको ‘कोशी–बंगाल सांस्कृतिक तथा पर्यटन उत्सव २०८२’ लाई आयोजकहरूले सीमापार पर्यटन सहकार्यको नयाँ मोडेलका रूपमा प्रस्तुत गरिरहेका छन्।
‘सीमापार संस्कृति, सम्पदा र पर्यटनको उत्सव’ भन्ने सन्देशसहित चैत २४ र २५ गते सञ्चालन हुने उक्त कार्यक्रम पश्चिम बंगाल सँगको सांस्कृतिक तथा पर्यटन सम्बन्ध विस्तार गर्ने लक्ष्यसहित अघि सारिएको हो।
पर्यटन कार्यालय काँकडभिट्टाको प्रवर्द्धनमा आयोजना हुन लागेको उत्सवले नेपाल–भारत पर्यटन सहकार्यलाई नयाँ उचाइमा लैजाने दाबी गरिएको छ।
आयोजक समितिकी संयोजक इन्दिरा श्रेष्ठका अनुसार निजी क्षेत्रको सहभागिता बढाउने, स्थानीय उत्पादनलाई प्रवर्द्धन गर्ने र कोशी प्रदेशलाई अन्तर्राष्ट्रिय पर्यटन नक्सामा स्थापित गर्ने उद्देश्यले कार्यक्रम ल्याइएको हो।
कार्यक्रमअन्तर्गत नेपालका १८ र बंगालका १२ गरी ३० वटा स्टल रहनेछन्। जहाँ स्थानीय खानाका परिकार, हस्तकला, पर्यटन प्याकेज तथा सेवा प्रदर्शन गरिनेछ।
सांस्कृतिक नृत्य, फोटो तथा चित्रकला प्रदर्शनीजस्ता आकर्षणले कार्यक्रमलाई रङ्गीन बनाउने भए पनि, यसलाई नेपाल–भारतबीच ‘सफ्ट डिप्लोमेसी’को अवसरका रूपमा प्रयोग गर्न सकिने सम्भावना पनि उत्तिकै छ।
तर त्यसका लागि सरकारी तहको औपचारिक सहभागिता र द्विपक्षीय समझदारी आवश्यक देखिने जानकारहरू बताउँछन्।
Discussion about this post