धरान : धरानस्थित बीपी कोइराला स्वास्थ्य विज्ञान प्रतिष्ठानले स्वास्थ्य सेवा क्षेत्रलाई थप पारदर्शी, गुणस्तरीय र सेवाग्राहीमैत्री बनाउन १३ बुँदे सुधार योजना अगाडि सारेको जनाएको छ।
नेपाल सरकार मन्त्रिपरिषद्को २०८२ चैत १३ गतेको शासकीय सुधार कार्यसूची अन्तर्गत प्रतिष्ठानका उपकुलपति प्रा.डा.विक्रम प्रसाद श्रेष्ठको अध्यक्षतामा बसेको उच्चस्तरीय बैठकले यस्तो निर्णय गरेको हो। बैठकमा रजिष्ट्रार, अस्पताल निर्देशकसहित उच्च अधिकारीहरूको सहभागिता रहेको थियो।
प्रतिष्ठानले १० प्रतिशत निःशुल्क शैय्या सेवाको विवरण रियल–टाइम ड्यासबोर्ड मार्फत सार्वजनिक गरिने जनाएको छ। यसैगरी बिरामी प्रेषण राष्ट्रिय निर्देशिका–२०८१ अनिवार्य कार्यान्वयन गर्दै डिजिटल प्रणाली विकास गरिने, कर्मचारीको उपस्थितिलाई कडाइका साथ अनुगमन गर्न समिति गठन, सरसफाइ अनुगमन ठन गरी नियमित निरीक्षण गर्ने निर्णय गरिएको छ।
यसैगरी सेवा गुणस्तर निगरानीलाई थप जिम्मेवारी, औषधिको मौज्दात र मूल्यमार्फत सार्वजनिक गरिने, जलन उपचार निःशुल्क अन्तर्गत बर्न बिरामीका लागि आधारभूत सेवा र शैय्याशुल्क निःशुल्क गर्ने निर्णय गरिएको प्रतिष्ठानले जनाएको छ।
वार्ड सरसफाइ जिम्मेवारीमार्फत प्रत्यक्ष व्यवस्थापन, स्वास्थ्यकर्मीका लागि सफ्ट स्कील तालिमलाई निरन्तरता, अस्पतालभित्र सेवा पत्ता लगाउन सहज संकेत प्रणाली विकास, ज्येष्ठ नागरिक, गर्भवती र अपाङ्गता भएका व्यक्तिलाई प्राथमिकतामा राखेर टोकन प्रणाली विस्तार, डिजिटल गुनासो प्रणाली, राष्ट्रिय आविष्कार केन्द्रसँग सहकार्यको प्रक्रिया अगाडि बढाइइनेजस्ता निर्णय गरिएको हो।
प्रतिष्ठानले यी निर्णयहरूको जानकारी स्वास्थ्य तथा जनसङ्ख्या मन्त्रालयलाई पठाइसकेको छ। साथै कार्यान्वयनका लागि सम्बन्धित विभागहरूलाई समयसीमासहित योजना बनाएर तत्काल अघि बढ्न निर्देशन दिइएको प्रवक्ता प्रा.डा. शमशेर श्रेष्ठले जानकारी दिए।
Discussion about this post