ताप्लेजुङ : ताप्लेजुङस्थित प्रसिद्ध तीर्थस्थल पाथीभरा देवी मन्दिरमा चैते दसैँको अवसरमा उल्लेख्य भीड देखिएको छ। पछिल्लो १० दिनको अवधिमा करिब १५ हजार भक्तजनले दर्शन गरेका छन्।
पाथीभरा क्षेत्र विकास समितिका अनुसार चैत १२ गतेदेखि शनिबारसम्म कुल १४ हजार ७९६ जनाले पाथीभरा दर्शन गरेका हुन्। दसैँ–तिहारपछि चैते दसैँ र रामनवमीको समयलाई पाथीभरा दर्शनको अर्को मुख्य सिजनका रूपमा लिइने गरिएको छ।
समितिका कार्यकारी निर्देशक प्रजिन हाङ्बाङका अनुसार यस अवधिमा भक्तजनको उपस्थिति दिनप्रतिदिन बढ्दो क्रममा रहेको छ।
सबैभन्दा बढी शनिबार एकै दिन ४ हजार २०८ जना भक्तजन पुगेका थिए। त्यस्तै, अघिल्लो शनिबार २ हजार ७३३ र चैत १३ गते रामनवमीका दिन २ हजार ७५ जना भक्तजनले दर्शन गरेका थिए।
पाथीभरा दर्शनका लागि नेपालका विभिन्न जिल्लासहित भारतको सिक्किम, दार्जिलिङ र पश्चिम बङ्गालबाटसमेत भक्तजन आउने गरेका छन्।
हाल मौसम अनुकूल रहेकाले भक्तजनको आगमन उल्लेख्य रूपमा बढेको समितिका कर्मचारी राजेन्द्र महतले जानकारी दिए।
Discussion about this post