सुनसरीमा स्रोत नखुलेको ६ लाखभन्दा बढी नगदसहित दुई जना पक्राउ

इटहरी : सुनसरीको कोशी गाउँपालिका–८ भण्टावारी नाकामा प्रहरीले स्रोत नखुलेको नेपाली तथा भारतीय रुपैयाँसहित दुई जनालाई नियन्त्रणमा लिएको छ।

इलाका प्रहरी कार्यालय भण्टावारीबाट खटिएको टोलीले शुक्रवार बिहान करिब ८ः३० बजेतिर भारतबाट नेपालतर्फ आउँदै गरेको को २१ प १४९५ नम्बरको मोटरसाइकललाई चेकजाँच गर्ने क्रममा नगद बरामद गरेको हो।

पक्राउ पर्नेमा मोटरसाइकल चालक सप्तरी तिलाठी कोइलारी गाउँपालिका–५ निवासी ५८ वर्षीय राम लखन यादव रहेका छन्। उनको साथबाट नेपाली रुपैयाँ ५ लाख १ हजार ५ सय ५ र भारतीय रुपैयाँ ५ हजार ३५० बरामद भएको प्रहरीले जनाएको छ।

त्यस्तै, मोटरसाइकलमा पछाडि सवार भारतको सुपौल जिल्ला, छिटही हनुमाननगर ग्राम पञ्चायत–१५ बस्ने ६५ वर्षीय प्रभु मुखियाको साथबाट नेपाली रुपैयाँ १ लाख ४७ हजार २ सय ५ तथा भारतीय रुपैयाँ ७ हजार ६ सय फेला परेको छ।

प्रहरीका अनुसार दुवै जनाको साथबाट जम्मा नेपाली रुपैयाँ ६ लाख ४८ हजार ७ सय १० र भारतीय रुपैयाँ १२ हजार ९५० बरामद भएको छ।

उनीहरूलाई नगद तथा मोटरसाइकलसहित नियन्त्रणमा लिई हुण्डी सम्बन्धी कसुरमा सुनसरी जिल्ला अदालतबाट पाँच दिन म्याद थप अनुमति लिइएको छ। घटनाबारे जिल्ला प्रहरी कार्यालय सुनसरीबाट थप अनुसन्धान भइरहेको प्रहरीले जनाएको छ।