झापा : झापाको अर्जुनधारा नगरपालिका–८ कुशलचोकस्थित खुला चौरमा मदिरा सेवनका क्रममा भएको विवादमा धकेलिँदा एक महिलाको मृत्यु भएको छ ।
घटनामा संलग्न आरोपमा प्रहरीले एक युवकलाई पक्राउ गरी ज्यान सम्बन्धी कसुरमा अनुसन्धान थालेको छ ।
मृत्यु हुनेमा अर्जुनधारा–८ निवासी २९ वर्षीया काजल बस्नेत (सुवेदी) रहेकी छन् ।
जिल्ला प्रहरी कार्यालय झापाका अनुसार वैशाख ४ गते राति करिब ९ः१५ बजेतिर एइम्स सेकेन्डरी बोर्डिङ स्कुल पश्चिमतर्फ रहेको खुला चौरमा मदिरा सेवनका क्रममा विवाद भएको थियो ।
सो क्रममा अर्जुनधारा–५ कञ्चनबाडी निवासी २४ वर्षीय किरण गौतमले धकेल्दा काजल चौरमा सिमाना छुट्याउन बनाइएको कंक्रिटको प्लममा टाउको ठोक्किएर गम्भीर घाइते भएकी थिइन् ।
स्थानीयवासीले तत्काल उद्धार गरेर शंकर अस्पताल पुर्याएका थिए । त्यहाँबाट थप उपचारका लागि बिर्तामोडस्थित वीएण्डसी अस्पताल लगिएको र पछि प्रादेशिक मेची अस्पताल भद्रपुर रेफर गरिएकोमा मंगलबार बिहान ४ः४० बजेतिर उपचारकै क्रममा उनको मृत्यु भएको प्रहरीले जनाएको छ ।
घटनालगत्तै इलाका प्रहरी कार्यालय अनारमनीबाट खटिएको टोलीले गौतमलाई घटनास्थलबाटै पक्राउ गरेको थियो ।
उनीविरुद्ध मुलुकी अपराध संहिता, २०७४ अन्तर्गत ज्यान सम्बन्धी कसुरमा मुद्दा दर्ता गरी जिल्ला अदालत झापाबाट पाँच दिनको म्याद थप गरेर अनुसन्धान भइरहेको प्रहरीले जनाएको छ ।
प्रहरीका अनुसार मृतकका श्रीमान वैदेशिक रोजगारीका सिलसिलामा दुबईमा रहेका छन् । घटनाबारे मृतककी दिदी प्रतिमा भट्टराईले प्रहरीमा जाहेरी दिएकी छन् ।
Discussion about this post