इटहरी : अदालतको फैसला कार्यान्वयनलाई प्रभावकारी बनाउने अभियानअन्तर्गत सुनसरी प्रहरीले विभिन्न मुद्दाका पाँच जना फरार प्रतिवादीलाई पक्राउ गरेको छ।
जिल्ला प्रहरी कार्यालय सुनसरी तथा मातहतका प्रहरी इकाइबाट खटिएको टोलीले उच्च अदालत विराटनगर र जिल्ला अदालत सुनसरीबाट दोषी ठहर भई फरार रहेका प्रतिवादीहरूलाई पक्राउ गरेको हो।
प्रहरीका अनुसार पक्राउ पर्नेमा ज्यान मार्ने उद्योग मुद्दाका धरान–११ का हर्कबहादुर लिम्बू र कृष्ण लिम्बू रहेका छन्। अदालतले दुवै जनालाई जनही एक वर्ष कैद र १०–१० हजार रुपैयाँ जरिवाना सजाय सुनाएको थियो।
यस्तै, बैंकिङ कसुर मुद्दामा दोषी ठहर भएका इटहरी–६ का धनलाल चौधरी र पुष्पलाल चौधरीलाई पनि प्रहरीले पक्राउ गरेको छ। उनीहरूबाट जनही ८ लाख १५ हजार २ सय १३ रुपैयाँ ८१ पैसा जरिवाना असुल हुन बाँकी रहेको प्रहरीले जनाएको छ।
त्यसैगरी, सवारी ज्यान मुद्दामा दोषी ठहर भएका इटहरी–५ का दलबहादुर माझी पनि पक्राउ परेका छन्। अदालतले उनलाई तीन वर्ष कैद र ३० हजार रुपैयाँ जरिवाना सजाय तोकेको थियो।
जिल्ला प्रहरी कार्यालय सुनसरीका अनुसार पक्राउ परेका सबै प्रतिवादीलाई फैसला कार्यान्वयनका लागि सम्बन्धित अदालतमा उपस्थित गराइएको छ।
अदालतका फैसला कार्यान्वयनलाई प्रभावकारी बनाउने तथा फरार प्रतिवादी पक्राउ अभियानलाई निरन्तरता दिइने प्रहरीले जनाएको छ।
Discussion about this post