इटहरी : स्थानीय तह निर्वाचन नजिकिँदै जाँदा इटहरीको राजनीतिक वृत्तमा नयाँ बहस सुरु भएको छ।
नेकपा एमालेका पूर्व नेता तथा इटहरी खानेपानी उपभोक्ता संस्थाका पूर्व अध्यक्ष रामप्रसाद चौलागाईं श्रम संस्कृति पार्टीमा प्रवेश गरेसँगै इटहरीको आगामी मेयर दौड थप रोचक बन्ने संकेत देखिएको छ।
एमालेमा लामो समय सक्रिय रहेका चौलागाईंले दुई महिनाअघि पार्टी परित्यागको घोषणा गरेका थिए। बुधबार उनले श्रम संस्कृति पार्टीका अध्यक्ष हर्कराज राई (हर्क साम्पाङ) सँगको तस्वीर सार्वजनिक गर्दै औपचारिक रूपमा पार्टीमा आबद्ध भएको जानकारी दिए।
उनी विगतका दुई स्थानीय निर्वाचनमा एमालेभित्रबाट मेयर पदका आकाङ्क्षी रहे पनि टिकट पाउन सकेका थिएनन्। पार्टी नेतृत्वसँगको असन्तुष्टि सार्वजनिक गर्दै आएका उनले अब नयाँ राजनीतिक मञ्च रोजेका छन्।
इटहरीमा स्वतन्त्र राजनीतिक धार निर्माण गर्ने प्रयासमा रहेका साम्पाङको श्रम संस्कृति पार्टीले पछिल्लो समय स्थानीय तहका विभिन्न व्यक्तित्वलाई आकर्षित गर्न थालेको छ।
एमाले पृष्ठभूमिका नेताको प्रवेशले पार्टीलाई इटहरीमा थप संगठनात्मक आधार विस्तार गर्ने अवसर मिल्ने विश्लेषण गरिएको छ।
यद्यपि, एमालेकै बलमा १८ वर्षसम्म इटहरी खानेपानी उपभोक्ता संस्थाको अध्यक्ष भई लाभ लिएका चौलागाईं स्थानीय स्तरमा परिचित अनुहार हुन्।
साम्पाङले अघि बढाएको श्रम, उत्पादन र देश निर्माणको अभियानमा सहभागी हुन पाएकोमा चौलागाईले खुसी व्यक्त गरेका छन्। साथै, उनले अभियानमा जोडिन इच्छुक सबैलाई पार्टीमा आबद्ध हुन आग्रह गरेका छन्।
Discussion about this post