इटहरी : कोशी प्रदेशमा महिला फुटबलका खेलाडी उत्पादन र प्रतिस्पर्धात्मक वातावरण विस्तार गर्ने उद्देश्यसहित इटहरीमा पहिलोपटक प्रदेशस्तरीय महिला गोल्डकप आयोजना हुने भएको छ।
महिला फुटबलका प्रतियोगिता न्यून भइरहेका बेला हुन लागेको प्रतियोगितालाई खेलाडीका लागि नयाँ अवसरका रूपमा हेरिएको छ।
इटहरी फुटबल क्लबको आयोजनामा असार १५ देखि २० गतेसम्म इटहरीस्थित प्रादेशिक रङ्गशालामा प्रतियोगिता सञ्चालन हुनेछ। प्रतियोगितामा कोशी प्रदेशका आठ टोलीले उपाधिका लागि प्रतिस्पर्धा गर्नेछन्।
प्रतियोगितालाई दुई समूहमा विभाजन गरिएको छ। समूह ‘ए’ मा फेयर फुटबल क्लब सुनसरी, काँकडभिट्टा महिला फुटबल क्लब झापा, बेलबारी फुटबल क्लब मोरङ र सृजनशील महिला फुटबल क्लब तेह्रथुम छन्। समूह ‘बी’ मा धनकुटा जिल्ला फुटबल संघ, आत्मा पवित्र फुटबल क्लब इलाम, गाईघाट फुटबल क्लब उदयपुर र आयोजक इटहरी फुटबल क्लब रहेका छन्।
प्रतियोगिताको उद्घाटन खेल असार १५ गते बिहान फेयर फुटबल क्लब र काँकडभिट्टा महिला फुटबल क्लबबीच हुनेछ। सोही दिन बेलबारी फुटबल क्लब र सृजनशील महिला फुटबल क्लबबीच दोस्रो खेल हुनेछ। समूह ‘बी’ का खेल असार १६ र १८ गते हुनेछन् भने फाइनल खेल असार २० गते बिहान आयोजना गरिने प्रतियोगिता संयोजक दिपेन तामाङले जानकारी दिए।
प्रदेश खेलकुद विकास बोर्डको संयोजनमा हुने प्रतियोगिताको विजेताले दुई लाख रुपैयाँ र उपविजेताले एक लाख रुपैयाँ पुरस्कार प्राप्त गर्नेछन्।
सुनसरी जिल्ला खेलकुद विकास समितिका अध्यक्ष केशव कार्कीका अनुसार नेपालमा पुरुष फुटबलका प्रतियोगिता नियमित भइरहे पनि महिला फुटबलका प्रतियोगिता अपेक्षाकृत कम छन्।
त्यसैले इटहरीमा आयोजना हुन लागेको यो प्रतियोगिताले महिला खेलाडीलाई प्रतिस्पर्धात्मक अवसर उपलब्ध गराउनुका साथै प्रदेश र राष्ट्रिय टोलीका लागि नयाँ प्रतिभा उत्पादन गर्न सहयोग पुग्ने अपेक्षा गरिएको कार्कीले बताए।
Discussion about this post