इटहरी : शनिबार साँझ कोशी कलेजको सभाहलमा कविता, मौनता र संवेदनाको अद्भुत संगम देखियो।
काव्य डबलीले आफ्नो तेस्रो शृङ्खला आयोजना गर्दै विभिन्न पुस्ताका कविलाई एउटै मञ्चमा उभ्यायो। कार्यक्रम सुरु हुनुअघि हलमा एकाएक चकमन्न वातावरण बन्यो। त्यसपछि कविहरू एकपछि अर्को गर्दै मञ्चमा उक्लिए र आफ्ना सिर्जनामार्फत श्रोतालाई भावनाको गहिराइसम्म पुर्याए।
कार्यक्रमको सुरुआतमै काव्य डबलीका सोनु जयन्तीले उपस्थित सबैलाई ‘किप साइलेन्स’ रहन आग्रह गरे। त्यसपछि सुरु भएको काव्यपाठको शृङ्खलामा उपस्थित श्रोताले अन्तिमसम्म अनुशासित रूपमा कविता सुने।
तेस्रो शृङ्खलामा प्रज्वल पराजुली, जीवन आरोही, राज आशातीत, सवी मेवाहाङ, पराजीत पोमु, उमेश लुइँटेल, सुन्दर कुरुप, पुस्तिका भण्डारी, राजकुमार सुब्बा, नवराज मैनाली, विवेक विवश रेग्मी, राज माङलाक, मनु मञ्जिल र देवान किरातीले आ–आफ्ना कविता वाचन गरेका थिए।
कविहरूले प्रेम, प्रकृति, समय, राजनीति, समाज, मानवीय सम्बन्ध, पहिचान र समकालीन जीवनका विविध आयामलाई आफ्ना कवितामार्फत प्रस्तुत गरेका थिए। कविता वाचनका क्रममा सभाहलमा उपस्थित साहित्यप्रेमीहरू घरी गम्भीर बने, घरी मुस्कुराए र घरी लामो ताली बजाए।
कार्यक्रममा सहभागी साहित्यप्रेमीहरूले यस्ता काव्यिक जमघटले इटहरीको साहित्यिक वातावरणलाई थप जीवन्त बनाएको प्रतिक्रिया दिएका थिए। नयाँ र स्थापित दुवै पुस्ताका कविलाई एउटै मञ्चमा प्रस्तुत गराउने काव्य डबलीको प्रयासलाई उनीहरूले सकारात्मक रूपमा लिएका छन्।
आयोजकका अनुसार काव्य डबलीको उद्देश्य कविता लेखन र वाचनको संस्कृतिलाई निरन्तरता दिनुका साथै सिर्जनशील व्यक्तिहरूलाई साझा मञ्च उपलब्ध गराउनु हो।
काव्य डबलीले हरेक दुई महिनामा नियमित रूपमा काव्यपाठ कार्यक्रम आयोजना गर्ने जनाएको छ। नियमित शृङ्खलामार्फत कोशी प्रदेशकै साहित्यिक गतिविधिलाई थप सक्रिय र सशक्त बनाउने विश्वास आयोजकको छ।
Discussion about this post