इटहरी : आगामी आर्थिक वर्ष २०८३।८४ को बजेटलाई लिएर सत्तारुढ दलभित्रै विवाद चर्किएपछि कोशी प्रदेशसभाको बैठक लगातार तेस्रो पटक स्थगित गरिएको छ।
बिहीबार दिउँसो १ बजे बस्ने तय भएको प्रदेशसभाको नवौँ अधिवेशनको १६औँ बैठक सरकारकै अनुरोधमा स्थगित गरिएको प्रदेशसभा सचिवालयले जनाएको छ।
प्रदेशसभा नियमावली, २०७४ को नियम ६ को उपनियम (३) बमोजिम सभामुखले बैठक असार १९ गते शुक्रबार दिउँसो १ बजे बस्ने गरी निर्धारण गरेका छन्।
बजेट वितरण असमान भएको, सीमित निर्वाचन क्षेत्रमा योजना केन्द्रित गरिएको तथा मन्त्री केन्द्रित र वितरणमुखी बजेट ल्याइएको भन्दै सत्तारुढ दल नेकपा एमाले र नेपाली कांग्रेसकै सांसदहरूले असन्तुष्टि जनाउँदै आएका छन्।
बजेटमाथि सहमति जुट्न नसकेपछि बैठक पुनः सारिएको हो। बजेट प्रस्तुत भएपछि प्रदेशसभाको बैठक लगातार तेस्रो पटक स्थगित भएको हो।
यसअघि असार ११ गतेका लागि तय भएको बैठक असार १६ गतेका लागि सारिएको थियो। त्यसपछि पुनः असार १८ गतेका लागि तय गरिएको बैठक पनि सहमति जुट्न नसक्दा शुक्रबारका लागि सारिएको छ।
विवाद समाधानका लागि सत्ता गठबन्धनले एमाले र कांग्रेसका तीन–तीन जना सदस्य रहने गरी ६ सदस्यीय संयुक्त कार्यदल गठन गरेको छ।
कार्यदलले असन्तुष्ट सांसदका माग, बजेट वितरणमा देखिएको असन्तुलन तथा छुटेका योजनाबारे छलफल गरिरहेको भए पनि हालसम्म ठोस सहमति जुट्न सकेको छैन।
सत्तारुढ सांसदहरूले बजेटमा आवश्यक सुधार नभएसम्म संसद् अघि बढ्न नदिने अडान राख्दै आएका छन्। त्यसपछि सरकार र सत्ता गठबन्धनभित्र बजेट संशोधनका सम्भावित विकल्पबारे निरन्तर छलफल भइरहेको छ।
बजेट विवाद लम्बिँदै जाँदा प्रदेश सरकारमाथि राजनीतिक दबाब बढेको छ भने संसद्मा दर्ता भइसकेको बजेट संशोधन गर्न सकिने वा नसकिने विषयमा संवैधानिक तथा संसदीय बहससमेत तीव्र बनेको छ।
Discussion about this post