इटहरी : अमेरिकी समाचार संस्था सीएनएनले विश्वका उत्कृष्ट गन्तव्यमध्ये एकमा सूचीकृत गरेको धनकुटाको नाम्जे गाउँमा पर्यटकको चहलपहल बढ्दो छ। तर, पर्यटकको बसाइ अवधि छोटो हुनु र एकीकृत पर्यटन प्याकेज नबन्नु अहिलेको मुख्य चुनौती बनेको छ।
कोशी प्रदेश सरकारले भ्रमण वर्ष मनाइरहेको अवस्थामा नाम्जेमा दैनिक सयौँ पर्यटक पुग्ने भए पनि अधिकांश एक रात बसेर फर्किने गरेका छन्।
पर्यटन व्यवसायीहरूका अनुसार गाउँमा पर्यटक त आइरहेका छन्, तर उनीहरूलाई दुई–तीन दिन रोक्ने गतिविधि र पूर्वाधार अझै विकास हुन सकेको छैन।
साँघुरीगढी गाउँपालिका–६ स्थित नाम्जेमा दुई दर्जनभन्दा बढी घरले सामुदायिक होमस्टे सञ्चालन गरेका छन्।
गाउँपालिका अध्यक्ष जितेन्द्र रुम्दाली राईका अनुसार एकै दिन दुई सयभन्दा बढी पर्यटकलाई बासको व्यवस्था गर्न सकिन्छ। ‘बुकिङबिनै आउने पाहुनालाई व्यवस्थापन गर्न कठिन हुन्छ,’ उनले भने, ‘तर अब हाम्रो चुनौती संख्या बढाउनेभन्दा पनि बसाइ लम्ब्याउने हो।’
नाम्जेमा पुग्ने अधिकांश पर्यटक भेडेटार घुमेपछि नाम्जे पुगेर एक रात बास बस्ने र भोलिपल्ट फर्किने गर्छन्।
स्थानीय राजकुमार मगरका अनुसार स्थानीय संस्कृति, पदयात्रा, कृषि अनुभव, प्रकृतिसँग जोडिएका गतिविधि र आसपासका गन्तव्यलाई एउटै प्याकेजमा जोड्न सके पर्यटकको बसाइ अवधि बढाउन सकिन्छ।
सीएनएनले २०६८ सालमा नाम्जेलाई विश्वका १२ उत्कृष्ट गन्तव्यमध्ये आठौँ स्थानमा राख्दा यहाँका आत्माघर, मगर समुदायको हुर्रा नाच, हात्तीसुँडे झरना, सूर्योदय बुद्धबिहार, लोप्सेडाँडा, अर्ग्यानिक गाउँलगायतका विशेषतालाई आधार बनाएको थियो। त्यसपछि होमस्टे संस्कृति विस्तार भएको मगर बताउँछन्।
हाल गाउँका ९५ प्रतिशतभन्दा बढी बासिन्दा मगर समुदायका छन्। अर्ग्यानिक परिकार, हुर्रा नाच, स्थानीय जीवनशैली र परिवर्तनशील मौसम नाम्जेका मुख्य आकर्षण मानिन्छन्।
केही मिनेटमै कुहिरो, घाम, पानी र चिसो अनुभव गर्न पाइने यहाँको मौसमले पनि पर्यटकलाई लोभ्याउने गरेको छ।
नाम्जेबाट ओख्रे टावर, राजारानी तालसहितआसपासका अन्य पर्यटकीय स्थल सहजै पुग्न सकिन्छ। तर ती गन्तव्यलाई एउटै सर्किटका रूपमा विकास गर्ने योजना अझै प्रभावकारी रूपमा अघि बढ्न सकेको छैन।
पर्यटन व्यवसायीहरूका अनुसार कोशी प्रदेशको भ्रमण वर्षलाई उपलब्धिमूलक बनाउने हो भने नाम्जेजस्ता पहिचान बनाइसकेका गन्तव्यमा नयाँ गतिविधि, सांस्कृतिक कार्यक्रम र डिजिटल प्रचारलाई जोड दिनुपर्ने देखिन्छ।
उनीहरूका अनुसार नाम्जेमा पर्यटक ल्याउने काम धेरै हदसम्म सफल भइसकेको छ, अब उनीहरूलाई धेरै दिन यहीँ बस्ने रणनीति आवश्यक छ।
Discussion about this post