गृहमन्त्री सुदन गुरुङले इटहरीको स्यार्सेकाली पुगेर खाए खाना, ‘जाहेरी नलिने’ प्रहरीलाई जिम्मेवार बन्न निर्देशन

इटहरी : गृहमन्त्री सुदन गुरुङले शनिबार इटहरीमा सर्वसाधारणबाट प्रहरीले जाहेरी नलिएको गुनासो सुनेपछि सम्बन्धित प्रहरी अधिकारीलाई जिम्मेवार भएर कानुनी प्रक्रिया अघि बढाउन निर्देशन दिएका छन्।

कोशी प्रदेश भ्रमणका क्रममा विराटनगरका विभिन्न सुरक्षा निकायको निरीक्षण सकेर धरान जाने क्रममा गृहमन्त्री गुरुङ इटहरी–१६ स्यार्सेकालीस्थित इन्दिरा स्टाफ होटलमा खाना खान पुगेका थिए। खाना खाने क्रममा स्थानीय सर्वसाधारणले आफ्ना समस्या र गुनासा गृहमन्त्रीसमक्ष राखेका थिए।

त्यसक्रममा एक स्थानीयले लेनदेनसम्बन्धी विवादमा छिमेकीबाट कुटपिटमा परे पनि इलाका प्रहरी कार्यालय पकलीले आफ्नो जाहेरी दर्ता नगरेको गुनासो गरेका थिए।

पीडितको कुरा सुनेपछि गृहमन्त्री गुरुङले तत्काल उपस्थित प्रहरी अधिकारीलाई मुद्दाको कानुनी प्रक्रिया अघि बढाउन निर्देशन दिए।

पीडितले आफू अन्यायमा परेको बताएपछि गृहमन्त्रीले प्रहरी अधिकारीतर्फ संकेत गर्दै, ‘यो मुद्दा समाधान गर्नुहोस्, कानुनी प्रक्रियाअनुसार अघि बढ्नुस्,’ भन्दै जिम्मेवार बन्न निर्देशन दिएका थिए।

उक्त अवसरमा मिर्गौला रोगबाट पीडित एक व्यक्तिले घरधनीले कोठाबाट निकालेको र उपचारका क्रममा अस्पतालबाट समेत समस्या भएको गुनासो गरेका थिए। गृहमन्त्री गुरुङले सम्बन्धित निकायसँग समन्वय गरी समस्या समाधानका लागि पहल गर्ने आश्वासन दिए।

यसअघि शनिबार बिहान बुद्ध एयरको विमानमार्फत विराटनगर पुगेका गृहमन्त्री गुरुङले जिल्ला प्रशासन कार्यालय मोरङ, रानीस्थित जोगबनी सीमा नाका, विराटनगर भन्सार कार्यालय तथा जिल्ला प्रहरी कार्यालय मोरङको निरीक्षण गरेका थिए।

जिल्ला प्रहरी कार्यालयको निरीक्षणका क्रममा उनले हिरासत कक्ष, शाखा र ब्यारेकको अवलोकन गर्नुका साथै प्रहरी कर्मचारीसँग प्रत्यक्ष छलफल गरेका थिए।

उनले प्रहरीलाई नागरिकप्रति उत्तरदायी, सेवामुखी र जिम्मेवार भएर काम गर्न निर्देशन दिँदै अपराध नियन्त्रण र शान्ति सुरक्षालाई प्रभावकारी बनाउन जोड दिएका थिए।

विराटनगर विमानस्थलमा सञ्चारकर्मीसँग कुराकानी गर्दै गृहमन्त्री गुरुङले देशभरका प्रहरी कार्यालयका जीर्ण भवन र भौतिक पूर्वाधार सुधार सरकारको प्राथमिकतामा रहेको बताए।