विराटनगर : विराटनगरमा लागूऔषध सेवन (लापसे) गरी सवारी चलाइरहेका १० चालकलाई प्रहरीले नियन्त्रणमा लिएको छ।
बढ्दो सवारी दुर्घटना रोक्न सञ्चालन गरिएको विशेष चेकजाँचका क्रममा सार्वजनिक सवारीका नौ चालक र एक मोटरसाइकल चालक पक्राउ परेका हुन्।
जिल्ला ट्राफिक प्रहरी कार्यालय मोरङ र इलाका प्रहरी कार्यालय रानीको संयुक्त टोलीले विराटनगर–१६ हुलास चोकमा चिकित्सकको उपस्थितिमा लापसे परीक्षण गर्दा १० चालकको रिपोर्ट पोजिटिभ आएको प्रहरीले जनाएको छ।
पक्राउ परेकामध्ये नौ जना सिटी सफारी चालक र एक जना मोटरसाइकल चालक रहेका छन्।
पक्राउ पर्नेमा विराटनगर–१८ का २१ वर्षीय सुभाष यादव रहेका छन् । उनी प्र १–०४–००२ प २२३६ नम्बरको मोटरसाइकलका चालक हुन् ।
त्यसैगरी विराटनगर–१४ का २४ वर्षीय दिलावर अन्सारी (प्र १–०२–००४ ह २९०२), कटहरी गाउँपालिका–४ का २७ वर्षीय उमेशकुमार ऋषिदेव (प्र १–०१–००२ ह ३२७७), विराटनगर–१२ का २२ वर्षीय मोहम्मद हुसेन (प्र १–०२–००४ ह ७३४०), विराटनगर–१५ का ३१ वर्षीय विशाल साह (प्र १ ह ०९५६), विराटनगर–४ का २२ वर्षीय अभिषेक यादव ( प्र१–०२–००४ ह ०३३५) पक्राउ परेका छन् ।
त्यस्तै, पक्राउ पर्ने अन्यमा विराटनगर–१३ का २८ वर्षीय सुरज मण्डल (प्र १–०२–००३ ह ६२३९), विराटनगर–९ का ४२ वर्षीय रजक मियाँ (प्र ०२–००२ ह ९३६२), विराटनगर–६ का २४ वर्षीय शिवम साह (प्र १–०३–००३ ह ७४९१) र विराटनगर–८ का २३ वर्षीय आयुष घिमिरे (प्र १–०२–००४ ह ८३१०) रहेका छन् । सुभाष यादवबाहेक पक्राउ पर्नेहरु सबै सिटी सफारी चालक हुन् ।
उनीहरूलाई सम्बन्धित सवारीसाधनसहित नियन्त्रणमा लिएर इलाका प्रहरी कार्यालय रानीमा राखी थप अनुसन्धान अघि बढाइएको मोरङ प्रहरीका सूचना अधिकारी डीएसपी मकेन्द्रकुमार मिश्रले जानकारी दिए।
मोरङ प्रहरीका अनुसार पछिल्लो समय मादक पदार्थ तथा लागूऔषध सेवन गरेर सवारी चलाउने प्रवृत्ति बढ्दै जाँदा दुर्घटनाको जोखिम पनि बढेकाले यस्ता विशेष चेकजाँचलाई निरन्तरता दिइनेछ।
जिल्ला प्रहरी प्रमुख एसपी कवित कटवालले मापसे वा लापसे गरेर सवारी नचलाउन चालकलाई आग्रह गर्दै उल्लंघन गर्नेविरुद्ध कानुनअनुसार कडा कारबाही गरिने चेतावनी दिएका छन्।
साथै, यस्ता गतिविधिबारे जानकारी भए नेपाल प्रहरीको हटलाइन १०० वा ट्राफिक प्रहरीको १०३ मा सूचना दिन सर्वसाधारणलाई अनुरोध गरेका छन्।
Discussion about this post