इटहरी : मोरङको सुन्दरहरैँचा नगरपालिका–१० स्थित सुकुना माध्यमिक विद्यालयमा छात्रामाथि दुर्व्यवहार गरेको आरोप लागेको छ।
घटनामा संलग्न रहेको आरोपमा दुई शिक्षक र एक सवारी चालक पक्राउ परेका छन् भने नगरपालिकाले उनीहरूलाई तत्काल निलम्बन गरी कानुनी प्रक्रिया अघि बढाउन विद्यालयलाई निर्देशन दिएको छ।
जिल्ला प्रहरी कार्यालय मोरङका सूचना अधिकारी (डीएसपी) मकेन्द्रकुमार मिश्रका अनुसार पक्राउ पर्नेमा विद्यालयका शिक्षक सुन्दरहरैँचा–२ का ३० वर्षीय किशोरलाल गच्छदार, सुन्दरहरैँचा–१२ का ३५ वर्षीय अविरल मास्के र विद्यालयका सवारी चालक सुन्दरहरैँचा–१० का ४० वर्षीय प्रदीप भट्टराई रहेका छन्। उनीहरूलाई सोमबार नियन्त्रणमा लिएर अनुसन्धान सुरु गरिएको प्रहरीले जनाएको छ।
प्रहरीको प्रारम्भिक अनुसन्धानअनुसार विद्यालयका केही छात्रालाई मोबाइलमार्फत व्यक्तिगत सन्देश पठाउने, परीक्षामा उत्तीर्ण गराइदिने आश्वासन दिने, गोप्य अंग देखाउन भन्ने गरेको तथा अमर्यादित व्यवहार गरेको उजुरीपछि अनुसन्धान अघि बढाइएको हो।
घटनामा यौनजन्य दुर्व्यवहारको कोणसमेत हुन सक्ने आशंकामा प्रहरीले प्रमाण संकलन र बयान लिने काम तीव्र बनाएको डीएसपी मिश्रले जानकारी दिए।
घटनाले विद्यालयमा तनावको अवस्था सिर्जना भएपछि विद्यार्थीहरूले विरोध प्रदर्शनको तयारी गरेका थिए। त्यसपछि प्रहरीले विद्यालय पुगेर अवस्था नियन्त्रणमा लिँदै अनुसन्धान सुरु गरेको हो।
यसैबीच, सुन्दरहरैँचा नगरपालिकाले घटनालाई गम्भीर रूपमा लिँदै विद्यालयलाई पत्र पठाएको छ। प्रमुख प्रशासकीय अधिकृत गणेशराज कार्कीले आरोपित शिक्षक तथा कर्मचारीलाई तत्काल निलम्बन गरी प्रचलित कानुनअनुसार कारबाही प्रक्रिया अघि बढाउन निर्देशन दिएका छन्।
छानबिनको प्रगति र कारबाहीको विवरण नगरपालिकालाई उपलब्ध गराउन पनि विद्यालय व्यवस्थापनलाई भनिएको छ।
घटनापछि विद्यार्थी र अभिभावकमा आक्रोश बढेको छ। विद्यालय परिसरमा सुरक्षित शैक्षिक वातावरण कायम गर्न, दोषीमाथि कडा कारबाही गर्न तथा यस्ता घटना दोहोरिन नदिन प्रभावकारी व्यवस्था गर्न उनीहरूले माग गरेका छन्।
प्रहरीले अनुसन्धान जारी रहेको जनाउँदै प्रमाणका आधारमा संलग्न देखिने जोसुकैलाई कानुनबमोजिम कारबाही गरिने स्पष्ट पारेको छ।
साथै, अनुसन्धान प्रभावित हुने गरी सामाजिक सञ्जालमा अपुष्ट वा भ्रामक सामग्री प्रसारण नगर्न सर्वसाधारणलाई आग्रह गरेको छ।
Discussion about this post