इटहरी : कोशी प्रदेशका मुख्यमन्त्री हिक्मतकुमार कार्कीले विश्वासको मत लिनुअघि नै सरकारको सत्ता समीकरण बदलिएको छ ।
नेपाली कांग्रेसले सरकारलाई दिएको समर्थन फिर्ता लिएपछि कार्की नेतृत्वको सरकारमाथि विश्वासको मत जुटाउने दबाब बढेको हो ।
कांग्रेसले बुधबार औपचारिक रूपमा समर्थन फिर्ता लिएर प्रदेशसभामा विपक्षी बेन्चमा बस्ने निर्णय गरेको छ । कांग्रेस संसदीय दलको बैठक चलिरहेका बेला प्रदेशसभा सचिवालयमा समर्थन फिर्ताको पत्र दर्ता गरिएको हो ।
प्रदेशसभा सचिव सुदर्शन खड्काका अनुसार कांग्रेसले आफू अब सत्तापक्षमा नरहेको जानकारी गराउँदै विपक्षी बेन्चको व्यवस्था गर्न सचिवालयलाई आग्रह गरेको छ ।
मुख्यमन्त्री कार्कीले शुक्रबार प्रदेशसभाबाट विश्वासको मत लिने तयारी गरिरहेका बेला कांग्रेसको यो निर्णय आएको हो । कांग्रेसले समर्थन कायम राख्न मुख्यमन्त्री कार्कीले गरेको आग्रहसमेत अस्वीकार गरेको छ ।
सोमबार नेपाली कम्युनिस्ट पार्टी (नेकपा) सरकारमा सहभागी भएपछि कांग्रेस सरकारबाट बाहिरिएको थियो । त्यसपछि कांग्रेसले सरकारलाई दिएको समर्थनसमेत फिर्ता लिने निर्णय गरेको हो ।
प्रदेशसभामा कांग्रेसका २९ सांसद छन् । कांग्रेस विपक्षमा गएपछि मुख्यमन्त्री कार्कीले विश्वासको मतका लागि आवश्यक संख्या जुटाउन नयाँ सत्ता समीकरणमा निर्भर हुनुपर्ने अवस्था बनेको छ ।
यसअघि एमाले र कांग्रेसको संयुक्त सरकार सञ्चालनमा थियो । तर, नेकपा सरकारमा सहभागी भएसँगै सत्ता गठबन्धनको संरचना फेरिएको हो । कांग्रेसको समर्थन फिर्तासँगै अब शुक्रबार हुने विश्वासको मतले सरकारको आगामी राजनीतिक दिशा तय गर्नेछ ।
कांग्रेसले भने आफू विपक्षीको भूमिकामा रहेर सरकारका कामकारबाहीमाथि निगरानी गर्ने जनाएको छ ।
प्रदेशसभामा बदलिएको समीकरणले सरकार गठनदेखि आगामी राजनीतिक सहकार्यसम्मको विषयलाई समेत नयाँ ढंगले प्रभावित गर्ने देखिएको छ ।
Discussion about this post