उदयपुर । अविरल वर्षासँगै आएको बाढी र पहिरोबाट प्रभावित उदयपुरको बेलका नगरपालिका–८ आहालेका विपद् पीडित परिवारलाई अस्थायी आवाससहित राहत सामग्री वितरण गरिएको छ ।
गत भदौ २६ गतेदेखि निरन्तर परेको वर्षाका कारण आहाले क्षेत्रमा बाढी र पहिरोले घर तथा बस्ती जोखिममा पारेपछि विस्थापित भएका परिवारलाई तत्कालको कठिनाइ टार्न अस्थायी घर तथा आवश्यक राहत सामग्री नेपाल रेडक्रस सोसाइटी जिल्ला शाखा उदयपुरद्धारा उपलब्ध गराइएको हो ।
बेलका नगरपालिकाका प्रमुख अशोक कार्की, नेपाल रेडक्रस सोसाइटी उदयपुरका सभापति मदनराज कटुवाल, नेपाल रेडक्रस सोसाइटी रेडक्रस उदयपुरका मन्त्री महेश रोका र रेडक्रस उदयपुरका कोषाध्यक्ष मोहन निरौलासहितको टोलीले प्रभावित क्षेत्रको स्थलगत निरीक्षण गर्दै पीडित परिवारलाई राहत सामग्री हस्तान्तरण गरेको हो । राहतस्वरूप विस्थापित परिवारका लागि अस्थायी आवासको व्यवस्था गर्नुका साथै बस्नका लागि म्याट, ओढ्नका लागि ब्लांकेट तथा वर्षाबाट जोगिन त्रिपाल लगायतका सामग्री वितरण गरिएको छ । विपद्का कारण घरमा बस्न सक्ने अवस्था नरहेका परिवारलाई तत्काल सुरक्षित स्थानमा बसोबासको व्यवस्था गर्न अस्थायी घर निर्माणमा समेत सहयोग गरिएको हो ।
स्थलगत निरीक्षणका क्रममा नगर प्रमुख अशोक कार्कीले विपद्को कठिन अवस्थामा नगरपालिका प्रभावित नागरिकको साथमा रहेको बताउँदै तत्कालीन राहतसँगै प्रभावित परिवारको पुनःस्थापना र दीर्घकालीन व्यवस्थापनका लागि आवश्यक पहल गरिने प्रतिबद्धता व्यक्त गर्नुभयो ।
टोलीले पहिरो तथा बाढीबाट भएको क्षतिको अवस्थाबारे स्थानीयवासीसँग प्रत्यक्ष जानकारीसमेत लिएको थियो । प्रभावित क्षेत्रमा अझै जोखिम कायमै रहेकाले आवश्यक सतर्कता अपनाउन आग्रह गर्दै थप आवश्यक राहत तथा पुनःस्थापनाका लागि सम्बन्धित निकायसँग समन्वय गरिने जनाइएको छ ।
विपद्पछि घरबारविहीन बनेका परिवारले अस्थायी आवास तथा राहत सामग्री पाएपछि तत्कालको कठिन अवस्थामा केही राहत मिलेको बताएका छन् । स्थानीयका अनुसार वर्षाका कारण बस्तीमा जोखिम बढेपछि सुरक्षित बसोबासको व्यवस्था सबैभन्दा ठूलो आवश्यकता बनेको थियो ।
बाढी र पहिरोले घर तथा भौतिक संरचनामा क्षति पु¥याएका परिवारलाई तत्काल राहतसँगै सुरक्षित आवास, खानेपानी, खाद्यान्न तथा दीर्घकालीन पुनःस्थापनाको आवश्यकता रहेको स्थानीयको भनाइ छ । नगरपालिकाले प्रभावित क्षेत्रको अवस्थालाई निरन्तर निगरानीमा राख्दै आवश्यक सहयोगलाई प्राथमिकताका साथ अघि बढाउने जनाएको छ ।
Discussion about this post