तरहरा : इटहरी र धरानबीचको चारकोशे झाडीमा अव्यवस्थित रुपमा फालिदैँ आएको दिशाजन्य फोहर फाल्न नपाईने निर्णय भएको छ ।
इटहरी उपमहानगरले धरानको क्षेत्रमा पर्ने चारकोशे जङ्गलमा सेफ्टी ट्याङ्कीको दिशाजन्य फोहर जथाभावी फालेको विषयमा धरान उपमहानगर र इटहरी उपमहानगरबीच आज छलफलमा भएको थियो ।
आज बिहान (आईतबार) धरान उपमहानगरमा दुई पक्षबीच बसेको बैठकले मानव स्वास्थ्य र वातावरणलाई प्रभाव नपर्ने तरिकाले सेफ्टी ट्याङ्कीको दिशाजन्य फोहोर व्यवस्थापन गर्ने निर्णय गरेको हो ।
धरान उपमहानगरका वातावरण शाखा प्रमुख भेषराज घिमिरेका अनुसार दुई पक्षबीच बसेको बैठकले सेफ्टी ट्याङ्कीको सञ्चालक समितिसँग बैठक बसेर दिशाजन्य फोहरलाई व्यवस्थित ढंगले व्यवस्थापन गर्न लगाउने निर्णय गरेको छ ।
साथै उनले सामुदायिक वन उपभोक्तासँग पनि छलफल गर्ने निर्णय भएको बताए । वातावरणलाई असर नहुने तरिकाले व्यवस्थित रुपमा दिशाजन्य फोहरलाई व्यवस्थापन गर्नुपर्ने दुवै पक्षले जोड दिएको उनले बताए ।
उनका अनुसार धरानमा जनवरी पहिलो सातादेखि वडा नं. ६ पानवारी स्थित फोहरबाट ऊर्जा निकाल्ने वेस्टटु इनर्जी परियोजना सञ्चालनमा आउने भएको छ ।
इटहरी उपमहानगरले पनि फोहर व्यवस्थापन गर्नका लागि ल्याण्डफिल्ड साइड निर्माण गर्दै गरेको छ । इटहरीको फोहोर व्यवस्थापन गर्ने ल्याण्डफिल्ड साइड आगामी चैतबाट सञ्चालनमा आउने उनले जानकारी दिए । यसरी चारकोशे जङ्गलमा दिशाजन्य फोहोर जथाभावी रुपमा फाल्न नदिने दुबै पक्षबीच आजको बैठकमा सम्झौता भएको उनले बताए ।
Discussion about this post