इटहरी प्रमुख प्रतिपक्षी दल नेपाली कांग्रेसले गठन गरेको कोभिड अनुगमन समितिका केन्द्रिय संयोजक तथा पूर्व परराष्ट्र मन्त्री डा। प्रकाशसरण महतले कोरोनाको नाममा करोडौँ भष्ट्राचार भएको बताएका छन् ।
सुनसरीको इटहरीमा बुधबार कोभिड १९ सुनसरी जिल्ला अनुगमन समितिले आयोजना गरेको अन्तरक्रिया कार्यक्रममा बोल्दै नेता महतले सो कुरा बताएका हुन् । अहिलेको कम्युनिष्ट सरकार भष्ट्राचार गर्न लिप्त भएको छ, उनले भने, ओली सरकार अहिलेसम्मकै नालायक बनेको छ ।
सरकारले कोरोना संक्रमितहरुको लागि सिन्को नभाँचेको आरोप लगाउँदै उनले सरकारको कडा आलोचना गरे ।
प्रदेश १ का संसदीय दलका नेता राजीव कोइरालाले फ्रन्टलाइनमा रहेर काम गर्ने मानिसहरु जोखिममा रहेको बताए। भ्याक्सिनको नाममा भ्रष्टाचार हुन सक्ने संकेत दिदैँ कोभिड १९ समितिले खबरदारी गर्नुपर्ने उनले बताए । कार्यक्रममा नेविसंघका सभापति राजीव ढुंगानाले जनता कोरोनाले त्रस्त रहेपनि सरकार जनताको जीवन रक्षामा नरहेको तर्क गरे ।
बहुमतको शासन र अल्पमतको कदर हुनुपर्ने भएपनि त्यसो नभएको उनले बताए । देश चलाउनेहरु पार्टीभन्दा माथि उठ्न सकेका छैनन्, उनले भने, सरकार निकम्मा भयो, जनताको हितमा कुनै पनि काम गर्नै सकेन । चुनावी आश्वासनमा जनता लोभ्याउने र चुनाव जितेपछि जनताको काँधमा टेकेर शासन गर्नमा वर्तमान नेकपाको सरकार केन्द्रित भएको ढुंगानाले बताए ।
त्यस्तै, नेपाली कांग्रेस कोभिड १९ अनुगमन समिति सुनसरीका संयोजक विकास केसीले इटहरी सरकारले कोरोनाको नाममा व्याप्त भ्रष्टाचार गरेको बताए ।
इटहरीमा देशकै सबैभन्दा ठूलो भ्रष्टाचार भएको छ, उनले भने, जनता क्याम्पसमा निर्माण गरिएको क्वारेन्टिनमा इटहरी उपमहानगरपालिकाले दुई करोड रुपैयाँ भ्रष्टाचार गरेको छ । विभिन्न शीर्षक देखाउँदै उपमहानगरपालिकाका सम्बन्धित निकायले भ्रष्टाचार गर्ने गरेको तथ्य आँफूहरुसँग रहेको उनको दाबी थियो । 
हामी अब केही दिनमा यसको हिसाब माग्छौँ, हिसाब नदिएको अवस्थामा आन्दोलनमा उत्रने छौँ, केसीले भने, भ्रष्टाचारको बिरुद्मा उग्र रुपमा उत्रने तयारीमा छौँ ।
कोभिडको नाममा देशमै भ्रष्टाचार मौलाइरहेको तर्क गर्दै उनले पीडितको नाममा घोटाला गरिरहेको आरोप लगाए ।
इटहरी सरकारले यथाशीघ्र कोभिडको हिसाब सार्वजनिक गर्नुपर्ने बताउँदै उनले यहाँ कोरोना लागेका पीडितको संख्या, निको भएकाको संख्या र कोरोनाले मृत्यु भएका मानिसको संख्या समेत इटहरीमा नहुनु गम्भीर लापरबाही रहेको बताए ।
कार्यक्रममा प्रतिनिधिसभाका सदस्य सीताराम मेहता, इनरुवा नगरपालिकाका मेयर राजन मेहता, बर्जु गाउँपालिका अध्यक्ष रघुनन्दन चौधरी, देवानगन्ज गाउँपालिकाका अध्यक्ष लाली मेहता, रामधुनी नगरपालिकाका मेयर जयप्रकाश चौधरी, क्षेत्रीय सभापति मणिराम श्रेष्ठ लगायतले बोलेका थिए
Discussion about this post