इटहरी : इटहरीमा जारी स्व. कृष्णप्रसाद भट्टराई स्मृति कोसी प्रदेशस्तरीय फुटबल प्रतियोगिताको तेस्रो दिनको खेलमा दमक फुटबल क्लब, झापा सेमिफाइनलमा प्रवेश गरेको छ ।
निर्धारित समयमा बराबरी भएपछि खेल ट्राइबेकरमा धकेलिएको थियो ।
दमकले लोहोरुङ फुटबल क्लब, संखुवासभालाई ३–१ गोल अन्तरले पराजित गर्दै सेमिफाइनलमा प्रवेश गरेको हो ।
दमकका लागि गिल्सन कन्दङ्वा, विशाल दर्जी र किस्मत लिम्बूले १–१ गोल गर्दा आशिष लावतीको प्रहार गोल पोस्टबाट बाहिरिएको थियो ।
लोहोरुङका लागि भने रोमन लिम्बूले मात्रै गोल गर्न सफल भए । उसका लागि विवेक राई, आरके कन्दङ्वा र उमेश राईको प्रहार दमकका गोल किप्पर आयुष लिम्बूले रोक्न सफल भए ।
खेलको निर्धारित समयमा दुवै टिमबाट गोल गर्ने प्रयास र पटकपटक अवसर आएपनि बराबरीमा टुंगिएको थियो । खेलको म्यान अफ दि म्याच दमकका गोल किप्पर आयुष लिम्बू घोषित हुँदै नगद पाँच हजारसहित ट्रफी हात पारे ।
द योङ्ग ब्रदर्श क्लब इटहरीको आयोजनामा जनता बहुमुखी क्याम्पसको खेल मैदानमा भइरहेको खेलमा अब मंगलबार आयोजक र सिंहदेवी फुटबल क्लब धनकुटाबीच प्रतिष्पर्धा हुनेछ ।
यसअघि आइतबार भएको खेलमा धरान फुटबल क्लब सुनसरीले गाईघाट फुटबल क्लब, उदयपुरलाई ४–० गोल अन्तरले पराजित गर्दै सेमिफाइनलमा प्रवेश गरेको छ ।
त्यसअघि शनिबार भएको पहिलो खेलमा बिटिएफसी (भगिमान तुम्बाहाम्फे फुटबल क्लब) तेह्रथुमले बेलबारी फुटबल क्लब मोरङलाई पराजित गर्दै सेमिफाइनलमा प्रवेश गरेको छ ।
आयोजक द योङ्ग ब्रदर्श क्लबका अध्यक्ष विजय सुब्बाका अनुसार कोसी प्रदेशका आठ वटा टिम सहभागी भएको प्रतियोगितामा विजेता टिमले नगद दुई लाख ११ हजार र उपबिजेता टिमले नगद एक लाख ११ हजारसहित ट्रफी, मेडल र प्रमाणपत्र प्राप्त गर्नेछन् ।
माघ २० गतेसम्म सञ्चालन हुने खेलमा कूल २० लाख खर्च हुने अनुमान गरिएको छ ।
Discussion about this post