इटहरी : यातायात व्यवस्था विभाग कार्यालय कोशी, इटहरीको आफ्नै भवन र पार्किङ स्थल नहुँदा अहिले सडकमै सर्वसाधारणले पार्किङ गर्दै आएका छन् ।
इटहरीमा भिन्नाभिन्नै स्थानमा रहेको दुईवटा यातायात व्यवस्था बिभागको कार्यालय नजिकै मुख्य राजमार्गमा पार्किङ गर्दा दुर्घटनाको जोखिम बढ्दै गएको छ ।
एउटा लाइसेन्स दिने र अर्को बिलबुक नवीकरण तथा सवारी साधन पास गर्ने ठाउँको यातायात नजिकै मुख्य राजमार्गमा पार्किङ गर्दा अहिले ट्राफिक प्रहरीलाई सवारी साधन व्यवस्थापन गर्न धौ – धौ परेको छ ।
इटहरीका नवराज मैनाली भन्छन्, ‘अहिले एकातिर लाइसेन्स रिन्यू र अर्कोतिर गाडी रिन्यू गर्ने ठाउँ छ, यतिबेला गाडी रिन्यू गर्ने ठाउँमा दुर्घटनाको जोखीम बढ्दो छ ।’ उनका अनुसार एउटा सवारी चालक अनुमति पत्र दिने ठाउँ हो भने अर्को सवारी साधन भएको कागजपत्र नवीकरण गर्ने ठाउँ रहेको छ ।
तर, यातायातका कर्मचारीको लापरबाहीका कारण सडकमै सवारी पार्किङ गरिदैँ आएकाले दुर्घटनाको जोखिम बढेको उनको तर्क छ । सार्वजनिक सडकमा यातायात कार्यालयको बेवास्ताका कारण सर्वसाधारणहरु सडकमा नै पार्किङ गर्दै आएको उनले बताए ।
‘यातायात विभागले अहिले बेवास्ता गरेको छ, मैले पनि धेरैपटक जानकारी गराउँदा बेवास्ता गर्ने गरेका छन्,’ मैनालीले भने, ‘यहाँ सडक विभागको पनि दोष छ, यातायात व्यवस्था विभागको पनि दोष छ ।’ उनले आयोजना कार्यालयले कमजोर पक्षतिर छिटै काम गर्ने तर अन्यतिर भने नगर्ने गरेको आरोप लगाए ।
आफ्नो कार्यालय आफैँ व्यवस्था गर्न नसक्नु र अहिले जनताको घर भत्काएर यातायात कार्यालयले दादागिरी गर्ने गरेको उनले बताए ।
इटहरीका विशाल रेग्मीले भने यातायात व्यवस्था विभागको चरम लापरबाहीका कारण अहिले दुर्घटनाको जोखिम रहेको तर्क गरे ।
उनले भने, ‘सवारी ओहोर दोहोर गर्ने ठाउँमै पार्किङ स्थल छ, करोडौँ राजस्व उठ्ने यातायात कार्यालयको आफ्नै पार्किङ स्थल नहुनु कतिको जायज हो ?’ उनले करोडौँ रुपैँया राजस्व उठ्ने यातायात कार्यालयको आफ्नै पार्किङ स्थल नहुँदा जनता हैरानीमा रहेको बताए ।
पूर्व क्षेत्रीय ट्राफिक प्रहरी कार्यालय प्रदेश १ का प्रमुख प्रहरी उपरीक्षक (एसपी) सञ्जीव शर्मा भन्छन्, ‘ट्राफिक प्रहरीले यातायात व्यवस्था विभागको अगाडि गएर पार्किङको व्यवस्था गर्ने होईन । हामीले सडक व्यवस्थापन गर्ने हो ।’
उनले अहिले ट्राफिकले सडक व्यवस्थापन भन्दा पनि पार्किङ लगायतका कुरामा ध्यान दिनु परिरहेकाले समस्या रहेको सुनाए । शर्माले ट्राफिक प्रहरीको अभाव रहेको समयमा पनि यातायात व्यवस्था विभागको अगाडि पार्किङका समस्यामा मात्र केन्द्रीत हुनुपरेको गुनासो गरे ।
यता, यस बिषयमा यातायात व्यवस्था विभाग इटहरीका सवारी पास गर्ने कार्यालयका प्रमुख राजकुमार गुप्ताले भने आँफूहरुले पार्किङ गर्ने ठाउँ खोजिरहेको प्रतिक्रिया दिए ।
‘पार्किङको लागि अगाडिको जग्गावाला सँग कुरा गरिहरेका छौँ,’ गुप्ताले टाकुरासँग भने, ‘हाम्रो नयाँ बिल्डिङ बन्ने कुरा छ, बन्यो भने समाधान हुन्छ, अहिलेका लागि त्यहीँ बिकल्प खोज्दैछौँ ।’ उनले अहिले यातायातको आफ्नै पार्किङ स्थल नहुँदा समस्या रहेको स्वीकार गर्दै आँफूहरुले जग्गा खोजिरहेको बताए ।
उता सडक विभागका इन्जिनियर सागर बडालका अनुसार इटहरीदेखि तरहराको पानीपिया सम्म करीब ५ किलोमिटर सडकमा पूर्णरुपमा तीनवटा घरमा क्षती भएको छ ।
बडालले टाकुरासँग भने, ‘तरहरादेखि आँपगाछीको यातायातसम्म हालसम्म सडक निर्माण गर्दा पूर्ण रुपमा ३ वटा घर भत्किएका छन् । आशिंक रुपमा एक चौथाई घर भत्किएको अवस्था छ ।’
मुख्य राजमार्गमै घर भएको स्थानमा ६५ फुट मात्रै सडक निर्माण गर्दा पनि तीनवटा घर भत्किएको र अन्य स्थानमा ८२ फुटको काम भएको उनले बताए । अहिले यातायात व्यवस्था विभागले भने सडकमा पार्किङ गरेको बिषयमा उनले ६ लेनको सडक पूर्ण रुपमा निर्माणको काम नसकिएकोले बाटोमा पार्किङ गरेको प्रतिक्रिया दिए ।
‘अहिले निर्माणकै क्रममा छ, भोलिका दिनमा सडक वान–वे हुन्छ,’ उनले भने, ‘वान–वे सडक भएपछि कुनै पनि हालतमा बाटोमा पार्किङ हुँदैन, म आफैँ पनि हिँडेर हुन्छ वा प्रशासन गुहारेर हुन्छ सडकमा पार्किङ गर्न दिनेछैन ।’
Discussion about this post