इटहरी : कोरोना पोजेटिभ देखिएपछि आइसोलेसनमा बस्नका लागि आह्वान गर्ने निकाय नै खुलेआम सक्रिय हुँदा स्थानीयमा त्रास बढेको छ ।
इटहरी उपमहानगरपालिका वडा नं. २ का वडाध्यक्ष हर्कबहादुर मगरलाई कोरोना पुष्टि भएपछि उनी खुलेआम सक्रिय भएका कारण स्थानीयमा त्रास बढेको हो ।
आँफूलाई कोरोना पोजेटिभ रिपोर्ट आएको पुष्टि भएपछि पनि उनी वडा कार्यालयमा गएको र काम गरेका कारण स्थानीयमा त्रास छाएको छ । मगरले गत कार्तिक २६ गते परीक्षणका लागि स्वाब दिएका थिए भने उनलाई २८ गते रिपोर्ट पोजेटिभ आएको इटहरी उपमहानगरपालिकाको स्वास्थ्य शाखाले जनाएको छ ।
सरकारले बनाएको स्वास्थ्य प्रोटोकलले पनि १४ दिन आईसोलेसनमा बस्नुपर्ने बताएपनि १४ दिन अगावै मगर कार्यालयको काममा गएका थिए ।
स्थानीय एकजनाले नाम नखुलाउने सर्तमा भने, ‘वडाध्यक्ष ज्यूलाई कोरोना पोजेटिभ आएपछि पनि उहाँ वडाका काममा सक्रिय हुनुहुन्छ, यसकारणले पनि हामी त्रासमा बस्न बाध्य भएका छौँ ।’
कोरोना रोकथाम तथा नियन्त्रणका लागि हाल सरकारले स्थानीय तहलाई जिम्मेवारी दिएको छ । सो को कार्यान्वयन गर्ने दायित्व बोकेका वडाध्यक्ष स्वयम् नै आईसोलेसनमा बस्नुपर्नेमा बाहिर सक्रिय बनेपछि समस्या चुलिदैँ गएको वडाबासी बताउँछन् ।
रोग नियन्त्रणका लागि मुलुकी अपराध संहिता २०७४ को दफा १०४ ‘क’ मा कसैले कसैको ज्यानलाई खतरामा पु¥याउनसक्ने कुनै पनि किसिमका सङ्क्रामक रोग फैलाउन नहुने र जानाजान फैलाउने कार्य गरेमा १० बर्ष कैद वा एक लाखसम्म जरिवाना, लापरबाहीपूर्वक गरेको भए ५ बर्ष कैद वा पचास हजार रुपैँया जरिवाना र हेलचेक्क्राईपुर्वक गरेको भए तीन बर्ष कैद र तीस हजार जरिवाना उल्लेख गरिएको छ ।
तर, सर्वसाधारणले कानुन उल्लङघन गरेको खण्डमा कानुन अनुसार कारबाही गराउने दायित्व बोकेका वडाध्यक्षले नै कानुनको ठाडो उल्लङघन गर्नु हितकारी नभएको वडाबासीको तर्क रहेको छ ।
यता वडाअध्यक्षले भने आफ्नो रिपोर्ट नभएको र सेवाग्राही आएकाले काम गरेर पठाएको प्रतिक्रिया दिए ।
उनले भने ‘मेरो रिपोर्ट होइन त्यसैले जनताको कामका लागि लागि परेको हु ।’
उता इटहरी उपमहानगरपालिकाका कोरोना फोकल पर्सन घनश्याम सिग्देलले भने वडाध्यक्ष मगरको रिपोर्ट रहेको पुष्टि गरेका छन् । उनले भने, ‘यो मानवीय कमजोरी हो । तर उहाँको भिटिएम नम्बर मिल्छ भिटिएम नम्बरका आधारमा उहाँकै रिपोर्ट हो ।’
कोरोना पोजेटिभ भएपछि वडाध्यक्ष मगरले सदस्य दुर्गा धमलालाई कार्यबाहक दिएका थिए । आँफूलाई कार्यबाहक दिएपनि नागरिकता सिफारिसको अधिकार नदिएकोले उनले नै सही गरेको बताईएको छ ।
‘आँफूले पाएको अधिकारको कुनै काम रोकिएको छैन । तर अधिकार नपाएको काम उहाँ आफैले गर्नुहुन्छ ।’ उनले भने ।
२६ गते स्वाब दिएका उनले कार्तिक २९ गते, मंसिर ३ गते र ७ गते कार्यालयमा गई सेवाग्राहीको काम गरेका थिए ।
Discussion about this post