इटहरी : दुई दिनअघि आएको बाढीले इटहरीबाट बगाएकामध्ये तीन जनाको शव फेला परेको छ ।
इलाका प्रहरी कार्यालय इटहरीका डीएसपी अर्जुन केसीका अनुसार इटहरी वडा नं. २ को पानीपियाबाट डुबेर बेपत्ता भएका सन्तोष तिवारी (योगेन्द्र) को बिहीबार बिहान वडा नं. १ को आपगाछीमा शव फेला परेको हो ।
यस्तै, इटहरीबाटै बाढीले बगाएका इटहरी ५ तुलसाटोलका ७१ वर्षीय चन्द्रमणि काफ्लेको पनि बुधबार शव भेटिएको थियो । यस्तैगरी, इलाम सूर्योदय वडा नं. ७ घर भई इटहरी वडा नं. २ मा मामाघर बस्दै आएका २१ वर्षे रोशन बुढाथोकीको पनि शव फेला परेको उनले बताए ।
‘आज बिहान चर्च पछाडि बुढाथोकीको शव फेला पारिएको थियो, तिवारीको आँपगाछीमा फेला परेको हो,’ डीएसपी केसीले टाकुरासँग भने, ‘खासमा इटहरीबाट पाँचजना बेपत्ता भएका हुन्, एकजना मोरङबाटै हराएपनि यहाँ निवेदन परेको छ ।’
उनका अनुसार इटहरी क्षेत्रबाट ५ जनालाई बाढीले बगाएको छ । ती मध्ये तीनको शव भेटियो भने दुईजना बेपत्ता छन् । प्रहरी कार्यालयमा परेको निवेदनका इटहरी वडा नं. ९ का बिनोद पराजुली र वडा नं. ७ का कैलाश मण्डल अझैसम्म भेटिएका छैनन् ।
उनीहरूको खोजी कार्य भइरहेको प्रहरीले जनाएको छ ।
यसअघि २०७४ साउन २७ गते राति आएको बाढीले इटहरी वडा नं. ३, ४, ९ र १० मा तहसनहस पारेको थियो। बाढीले इटहरी क्षेत्रमा मात्र नौ जनाको मृत्यु भएको थियो ।
जिल्ला प्रहरी कार्यालय सुुनसरीका अनुसार बेमौसमी बाढीले गर्दा पहिरोले पुरिएर र बाढीले बगाएर जिल्लामा हालसम्म आठ जनाको शव फेला परेको छ भने बेपत्ताको खोजी भइरहेको छ ।
Discussion about this post