इटहरी : अग्रज साहित्यकार, नेपाल संस्कृत विश्वविद्यालयका शिक्षाध्यक्ष तथा समालोचक समेत रहेका प्रा. डा. भीम खतिवडाको नयाँ कृति ‘गो ब्याक’ लोकार्पण गरिएको छ । सोमबार इटहरीमा आयोजित एक कार्यक्रमकाबीच उनको ‘हाइबुन’ मा आधारित रहेर तयार पारिएको ‘गो ब्याक’ नामक कृति लोकार्पण गरिएको हो ।
पूर्व सांसद तथा स्रष्टा समाज बेलबारीका अध्यक्ष हर्कमान तामाङ, लेखक खतिवडा, समीक्षक डा. दिवाकर रेग्मी, साहित्यकार डा. रामजी तिम्सिना, अग्रज कवि बद्री भिखारी लगायतले उनको कृतिको लोकार्पण गरेका थिए । दार्जिलिङको साहित्यिक गोष्ठीमा जाँदाको यात्रालाई उनले ‘गो ब्याक’ मा अटाएको खतिवडाले बताए ।
३६ वटा शीर्षकमा तयार पारिएको नियात्रा यात्राहरूको बर्णन रहेको उनले बताए । ‘यो कृति यात्राहरूको बर्णन नै हो,’ उनले भने, ‘लेखनका लागि अभ्यास र साधना आवश्यक पर्छ, यो कृति चैं यात्राहरूको संगालो हो ।’
कार्यक्रमका प्रमुख अतिथि स्रष्टा समाज बेलबारीका अध्यक्ष हर्कमान तामाङले कृतिका लेखकबाट, पत्रकारहरूबाट, अन्य कवि साहित्यकारबाट समाजको, देशको, मानवताको अभिवृद्धिका लागि कलम चल्नुपर्ने बताए । उनले भने, ‘यतिखेर मानिस मानिस जस्तो छैन, सामाजिक सञ्जालहरूबाट धेरै सूचनाहरू सङ्कलन गर्ने तर, उसको मौलिकता, आफ्नो दृष्टिकोण भने केही नहुने समस्या छ ।’
समीक्षक डा. दिवाकर रेग्मीले मानिसका लागि यात्रा भनेको पर्व जस्तै रहेको बताए । उनले भने, ‘लेखले पुस्तकमा उत्सव मनाउनु भएको रहेछ, मानिसका लागि यात्रा भनेको पर्व जस्तै हुन्छ ।’ पुस्तकमा मृत्युका बिम्बको प्रयोगले मृत्यु पनि जीवन्त रहेको रेग्मीको तर्क छ । सत्रौं शताब्दीमा जापानी साहित्यकार मात्सुओवासुले थालनी गरेको यो विधा नेपालमा एक किसिमले प्रयोग नै भएको समीक्षक रेग्मीले बताए । नेपालको धरानबाट सुरु भएको यात्रा मेचीपारि पुगेपछि भावनाको विशाल नेपालमा प्रवेश गरेको कुरा उल्लेख रहेको उनले बताए ।
इटहरीको पवित्रा साहित्य प्रतिष्ठानले आयोजना गरेको कार्यक्रममा साहित्यकार डा. रामजी तिम्सिना, अग्रज कवि बद्री भिखारी, धरान १३ का वडाध्यक्ष नेत्र काफ्ले, कवि छवि वैरागी घिमिरे लगायतले शुभकामना मंतब्य राखेका थिए । कार्यक्रममा प्रतिष्ठानका अध्यक्ष मुक्तिनाथ घिमिरेले स्वागत गर्दै आफूहरू हरेक महिना साहित्यिक कार्यक्रमको आयोजना गर्ने बताए । उनले भने, ‘मानिसले पठन संस्कृतिको विकास गर्नुपर्छ भन्ने उदेश्यले पनि हामी निरन्तर कार्यक्रम गर्नेछौँ ।’
कार्यक्रममा इटहरी, धरान, विराटनगर, बेलबारी, झुम्का लगायतबाट आमन्त्रित स्रष्टाहरू उपस्थित थिए ।
Discussion about this post