इटहरी : इटहरीमा लागूऔषधसहित चारजनालाई प्रहरीले पक्राउ गरेको छ । जसमध्ये दुईजना महिला रहेका छन् ।
श्रीमान–श्रीमतीसहित चारजनालाई प्रहरीले लागूऔषधसहित पक्राउ गरेको छ ।
जिल्ला प्रहरी कार्यालय सुनसरीका प्रहरी निरीक्षक बद्री दाहालका अनुसार इटहरीको आइतबारेबाट लागूऔषधसहित चारजनालाई प्रहरीले पक्राउ गरेको हो ।
साउन २० गते साँझको समयमा आइतबारेस्थित भाटे एण्ड खाजा घरमा इटहरी ४ बस्ने २७ वर्षीया सृजना ओझा र सोही स्थान बस्ने २८ वर्षीय सुशान्त घिमिरेले ब्राउनसुगरजस्तो लागूऔषध बिक्री गर्न लागिरहेको भन्ने सूचनाका आधारमा उनीहरूलाई पक्राउ गरिएको दाहालले जानकारी दिए ।
इलाका प्रहरी कार्यालय इटहरीबाट खटिएको प्रहरी टोलीले पक्राउ परेकी सृजना ओझाको झोला खानतलासी गर्दा १ ग्राम १५० मिलिग्राम ब्राउनसुगर, दुई हजार नगद र एक थान मोबाइल बरामद गरेको हो ।
यस्तै, सुशान्त घिमिरेको साथबाट नगद पाँच हजार र एक थान मोबाइल बरामद गरेको हो ।
उनीहरूमाथि अनुसन्धान गर्ने क्रममा धनकुटा शहिदभूमि गाउँपालिका वडा नं. ५ घर भई हाल इटहरी ५ मादेन मार्गमा डेरा गरी बस्ने ३४ वर्षीय विर्त सिंह राई र निजको श्रीमती ३५ वर्षीया पवित्रा राईबाट खरिद गरेको खुलेसँगै उनीहरूलाई पनि पक्राउ गरिएको हो ।
तत्काल खटिएको प्रहरी टोलीले इटहरी ५ बाट विर्त सिंह राईलाई फेला पारी शरीर खानतलासी गर्दा उनको साथमा राखेको ६ ग्राम ७६० मिलिग्रामको ब्राउनसुगर बरामद गरेको हो ।
यस्तै अनुसन्धानको क्रममा उनले कोठाभित्र लुकाई राखेको ३३ ग्राम ०९० मिलिग्राम भएको लागूऔषध जस्तो देखिने सेतो धुलो बरामद गरेको प्रहरीले जनाएको छ ।
यस्तै, डिजिटल तराजु एक थान, मोबाइल एक थान र २७ हजार तीन सय रुपैयाँ समेत बरामद गरिएको प्रहरीले जनाएको छ ।
पक्राउ परेका चारैजनामाथि सुनसरी जिल्ला अदालत १० दिनको म्याद थप गरी आवश्यक अनुसन्धान तथा कारबाहीको प्रक्रिया अगाडि बढाइएको प्रहरीले जनाएको छ ।
Discussion about this post