इटहरी : नेपाली कांग्रेस इटहरी उपमहानगरपालिकाको पार्टी कार्यालयमा तालाबन्दी गरिएको छ ।
मंगलबार बिहान कांग्रेस इटहरीका उपसभापति बालकृष्ण विष्टको नेतृत्वमा भेला भएका कार्यकर्ताले पार्टी कार्यालयमा तालबन्दी गरेका हुन् ।
विष्टका अनुसार इटहरी कांग्रेसका सभापति हेमकर्ण पौडेलले उपसभापति कोवितजंग कार्कीलाई कार्यवाहकको जिम्मेवारी दिएको र कार्यवहाकले विधान विपरीत मनोनयन गरेको तथा बैठक एवम् चुनावी समीक्षा नभएको भन्दै पार्टी कार्यालयमा तालाबन्दी गरिएको हो ।
‘पार्टीको १४ औँ महाधिवेशनमा हामी निर्वाचित भएको र स्थानीय तहको निर्वाचन सकिएपनि अहिलेसम्म एउटा समीक्षा बैठकसम्म भएको छैन,’ उनले भने, ‘स्थानीय तहको निर्वाचन भएपछि हामीले इटहरी नगरप्रमुख जितेका छौँ, तर ०७४ सालमा जितेका वडाहरू पनि अन्तर्घातका कारण हारेका छौँ, समीक्षा बैठक पनि हुनुपर्छ भनेर पटकपटक पदाधिकारीले बैठक राखौँ भन्दापनि बैठक भएको छैन ।’
उनले इटहरीका २० वटै वडाका नेता, कार्यकर्ताहरूलाई बोलाएर समीक्षा बैठक राख्नुपर्ने भएपनि स्थानीय निर्वाचन भएको चार महिना बित्न लाग्दा पनि नेतृत्वले वास्ता नगरेको आरोप लगाउँदै असन्तुष्टि जनाए ।
‘पार्टीका आधिकारिक उम्मेदवार विरुद्व खुलेआम उम्मेदवारी दिएर पार्टीलाई हराउन भूमिका खेल्नेहरूले गर्दा आज कार्यकर्ताहरूको मनोबल गिरेको अवस्था छ,’ विष्टले भने, ‘हामीले यस विषयमा तत्कालै नगरसभापतिलाई समीक्षा बैठक बोलाऔँ भनेर पटकपटक आग्रह गर्यौँ, केन्द्र, जिल्लामा समीक्षा बैठक हुँदा नगरले स्पष्टीकरण समेत सोधेको छैन ।’
गत असार २ गते मात्रै नगरका कार्यवाहक सभापति कार्कीले विधान विपरीत कोषाध्यक्ष नियुक्त गरेको समेत उनको आरोप छ ।
‘कोषाध्यक्ष नियुक्त गर्दा नगरको बैठक बस्नुपर्छ, हामीले को पात्र कोषाध्यक्ष बन्यो भन्ने कुरा होइन, विधि र विधान समेटियो, समेटिएन भन्ने कुरा उठाउन खोजेको हो,’ उनले भने ।
हुकुमी शैलिमा नेतृत्व अगाडि बढेकाले सचेत गराउन आफूहरू लागिपरेको उनको भनाई छ । प्रदेश र प्रतिनिधिसभाको मिति नजिकिदैँ गएपनि हार्ने र हराउनेबीच अझै अन्तरद्वन्द्व भएकाले त्यस विषयको समाधान गर्नुपर्ने उनको माग छ ।
पार्टीको नगर बैठक तत्काल बस्नुपर्ने उनको मागसहित आफूहरूले अनिश्तिकालका लागि तालाबन्दी गरेको उनले बताए ।
भिडियो
Discussion about this post