विराटनगर : प्रदेश नं १ मा सुरक्षा निकायका लागि खरिद गरिएका स्कटिङ मोटरसाइकल हस्तान्तरण गरिएको छ ।
बुधबार आन्तरिक मामिला तथा कानून मन्त्रालयमा आयोजित कार्यक्रममा सुरक्षाकर्मीलाई मोटरसाइकल हस्तान्तरण गरिएको हो ।
मोटरसाइकल हस्तान्तरण कार्यक्रममा बोल्दै प्रमुख अथिति प्रदेशका मुख्यमन्त्री राजेन्द्रकुमार राईले प्रदेश सरकारले सडकको सुरक्षामा गम्भीर भएर काम गरिरहेको बताए ।
कार्यक्रममा आन्तरिक मामिला तथा कानूनमन्त्री केदार कार्कीले अपराधलाई न्यूनीकरणका गर्नका लागि सुरक्षाकर्मीलाई मजबुद बनाउनुपर्नेमा जोड दिए ।
मन्त्री कार्कीले सुरक्षाकर्मीलाई आवश्यक स्रोत साधन जुटाउन प्रदेश सरकार लागिरहेको उल्लेख गर्दै अपराध न्यूनीकरणका लागि गम्भीर रहेको बताए ।
मन्त्री कार्कीले सडक अपराधलाई प्रविधिले निगरानी बढाउने भन्दै मुख्य राजमार्गमा सरकारले सिसी क्यामेरा जडान गरिरहेको बताए । ‘मेची, कोसी तथा रानी, धरान खण्डमा सिसी क्यामेरा जडानको अभियानमा छौँ, उनले भने, ‘प्रविधिमैत्री निगरानी भएमा अपराधी उम्कन पाउँदैन ।’
प्रदेश सरकार आन्तरिक मामिला तथा कानून मन्त्रालयबाट खरिद भएका ६ थान मोटरसाइकल प्रहरीलाई हस्तान्तरण गरिएको हो ।
मोटरसाइकल ग्रहण गर्दै प्रदेश नं १ प्रहरी कार्यालयका प्रमुख सुदीप गिरिले सरकारलाई धन्यवाद ज्ञापन गरे ।
ट्राफिक प्रहरीलाई यातायात व्यवस्थापनमा कठिनाई भइरहेको अवस्थामा प्रदेश सरकारको सहयोगले राहत पैदा भएको उनको भनाई छ ।
Discussion about this post