इटहरी : डेढ महिना अघि विराटनगरको क्षयरोग उपचार केन्द्रबाट भागेका एक कैदी पक्राउ परेका छन् । विराटनगरमा उपचार भइरहेका मध्ये एक जना कैदी झापाको झापा गाउँपालिका–५ शरणामतिबाट पक्राउ परेका हुन् ।
उपचारका लागि विराटनगर महानगरपालिका–७ मा रहेको क्षयरोग उपचार केन्द्रमा भर्ना गरिएका झापा–५ का २८ वर्षीय राजकुमार हेमरन गत असोज १५ गते फरार बनेका थिए । क्षयरोग उपचार केन्द्रबाट फरार बनेको डेढ महिनापछि हेमरन पक्राउ परेका हुन् ।
गाउँ घरमै लुकिछिपी बसेको अवस्थामा बिहीबार पक्राउ गरिएको मोरङ प्रहरी प्रमुख एसपी शान्तिराज कोइरालाले जानकारी दिएका छन् । जबरजस्ती करणी मुद्दामा अदालतले हेमरनलाई १६ वर्ष कैद सजायको फैसला सुनाएको थियो ।
अदालतको फैसलापछि विराटनगरस्थित जिल्ला कारागार मोरङमा सजाय भुक्तान गरिरहेका थिए । उनलाई अदालतले २०७५ सालमा दोषी ठहर गर्दै कैदको फैसला सुनाएको थियो । हेमरन क्षयरोगका बिरामी थिए ।
लागूऔषध मुद्दा विचाराधीन रहेका झापा गाउँपालिका–३ का २८ वर्षीय मञ्जिल गुरुङ पनि हेमरनसँगै भागेका थिए । लागूऔषध मुद्दामा अदालतले २०७८ कात्तिक ५ गते पुर्पक्षका लागि कारागार चलान गरेका गुरुङलाई उपचारका लागि हेमरनसँगै क्षयरोग उपचार केन्द्रमा भर्ना गरिएको थियो ।
प्रहरीले गुरुङको खोजी तीव्र पारिएको जनाएको छ ।
Discussion about this post