तरहरा : इटहरी २० तरहरामा रहेको शान्ति जनकल्याण बहुउद्येश्यीय सहकारी संस्था लिमिटेडको निर्वाचन शनिबार हुँदैछ ।
प्रमुख निर्वाचन अधिकृत द्रोर्ण न्यौपानेका अनुसार तरहराको कृषि फारम प्राङ्गणमा हुन लागेको निर्वाचनका लागि अध्यक्ष पदमा चारजनाले उम्मेदवारी दिएका छन् ।
अध्यक्ष पदका लागि चन्द्रकुमार गिरी, बीरबहादुर लिम्बू, बसन्त श्रेष्ठ र मेघराज पराजुलीले उम्मेदवारी दिएका छन् ।
गिरी तरहरा जेसीजका पूर्व अध्यक्ष तथा रेडक्रस सोसाइटी हाँसपोसा उपशाखाका पूर्व अध्यक्ष हुन् ।
यस्तै, लिम्बू तालतलैया विकास तथा संरक्षण समितिका पूर्व अध्यक्ष हुन् । श्रेष्ठ तरहरामा रहेका विभिन्न संघसंस्थामा नेतृत्व गरेका छन् भने पराजुली यसअघि सहकारीकै पदाधिकारी थिए ।
यस्तै, उपाध्यक्षमा तीनजना उम्मेदवारको रूपमा छन् । एक पदका लागि कृष्णप्रसाद भट्टराई, चिन्तामणी सापकोटा र टंक पौडेलले उम्मेदवारी दिएका छन् ।
भट्टराई तरहरा जेसीजका पूर्व अध्यक्ष तथा नेपाल रेडक्रस सोसाइटी सुनसरीका उपमन्त्री भइसकेका छन् । सापकोटा नेपाली कांग्रेस सुनसरी २ (क) का सचिव हुन् भने पौडेल शिक्षासेवी हुन् ।
यस्तै, लेखा समिति संयोजकमा कृष्णप्रसाद घिमिरे र लेखा समिति सदस्यमा सनत कोइराला निर्विरोध निर्वाचित भएका छन् । लेखा समिति महिला सदस्यमा भने एकजनाका लागि तीनजनाको उम्मेदवारी परेको छ ।
यस्तै, खुल्ला सदस्य ६ पदका लागि २३ जनाले उम्मेदवारी दिएका छन् । सञ्चालक समितिमा तीनजना महिलाका लागि ६ जनाले उम्मेदवारी दिएको प्रमुख निर्वाचन अधिकृत न्यौपानेले जानकारी दिए ।
‘जम्मा १४ पदमध्ये लेखा समिति संयोजक र एक सदस्य निर्विरोध निर्वाचित हुनुभएको छ,’ न्यौपानेले भने, ‘अरु १२ पदका लागि ३९ जनाबीच प्रतिष्पर्धा हुँदैछ ।’
उनका अनुसार कूल १ हजार ८४९ जना मतदाता छन् । शनिबार बिहान ११ः३० बजेबाट निर्वाचन सुरु हुने न्यौपानेले बताए ।
Discussion about this post