इटहरी : कोसी प्रदेशका मोरङ र झापा जिल्लाका विभिन्न स्थानहरूबाट नियन्त्रित लागूऔषध ब्राउनसुगरसहित ६ जनालाई प्रहरीले पक्राउ गरेको छ ।
लागूऔषधको ओसार पसार भइरहेको भन्ने विशेष सूचनाका आधारमा लागूऔषध नियन्त्रण ब्यूरो विराटनगरबाट खटिएको प्रहरी टोलीले बिराटनगर १५ बाट विराटनगर ११ का २० वर्षीय बिनायक शर्मा र २३ वर्षीय अमर कुमार साहलाई ब्राउनसुगर सहित पक्राउ गरेको हो ।
को ८ प ७६२ नम्बरको मोटरसाईकलमा सवार रहेका उनीहरूलाई रोकेर चेकजाँच गर्ने क्रममा उनीहरूको साथबाट २.६८ ग्राम लागूऔषध ब्राउनसगुर बरामद भएको थियो ।
यसैगरी धरान १६ का २१ वर्षीय मोहन श्रेष्ठ र लालिगुराँस नगरपालिका ७ तेह्रथुमका २८ वर्षीय राजेन्द्र भण्डारीलाई समेत विराटनगर १५ बाट १.५० ग्राम लागूऔषध ब्राउनसगुर सहित सोही टोलीले बुधवार दिउँसो पक्राउ गरेको हो ।
यसैगरी कोठा भाडामा लिई लागूऔषध बेचबिखन भइरहेको भन्ने सूचनाका आधारमा इलाका प्रहरी कार्यालय पथरीबाट खटिएको प्रहरी टोलीले कमल गाउँपालिका ७ घर भई पथरीमा बस्दै आएकी ३७ वर्षीया सन्जु फागोलाई लागूऔषध ब्राउनसुगरसहित पक्राउ गरेको छ ।
फागोको साथबाट प्रहरीले २३० मिलिग्राम ब्राउनसुगर बरामद गरेको हो भने लागूऔषध नियन्त्रण ब्यूरो काकडभिट्टाबाट खटिएको प्रहरी टोलीले भारतीय नागरिक ३४ वर्षीय ताहिर हुसेनलाई ४ ग्राम ब्राउनसुगरसहित मेचीपुलबाट बुधवार पक्राउ गरेको हो ।
लागूऔषधसहित पक्राउ परेका उनीहरूको सम्बन्धमा प्रहरीले थप अनुसन्धान गरिरहेको जनाएको छ ।
Discussion about this post