टाकुरा न्यूजको सम्पादकमा अर्जुन उप्रेती

इटहरी : गुरुकुल मिडिया प्रालिद्वारा सञ्चालित टाकुरा न्यूजको सम्पादकमा अर्जुन कुमार उप्रेती नियुक्त भएका छन् । मिडियाको सम्पादकीय नेतृत्वलाई थप प्रभावकारी बनाउने उद्देश्यसहित उप्रेतीलाई सम्पादकको जिम्मेवारी दिइएको हो ।

उप्रेतीले आफ्नो पत्रकारिता यात्रा पत्रकारिता २०५३ सालबाट विजयपुर साप्ताहिकबाट सुरु गरेका हुन् । उनले अन्नपूर्ण पोस्ट र दर्शन दैनिकमा संवाददाता, २०६२ देखि आफू सम्पादक प्रकाशक रहेर २०७५ सालसम्म हम्रो नयाँ संसार साप्ताहिक पत्रिका, हिमाल खबरमा फ्रिलान्सर लेख तथा न्यूज प्रकाशन गरेका छन् ।

यसअघि सप्तकोशी एफएमको स्टेशन म्यानेजरको जिम्मेवारीसमेत सम्हालिसकेका उप्रेतीले खोपके न्यूजमा फेलो रिपोर्टिङसमेत गरेका छन् । उनले समाचार लेखन, सम्पादन तथा सञ्चारसम्बन्धी विभिन्न क्षेत्रमा अनुभव हासिल गर्दै आएका छन् ।

उप्रेतीद्धारा लिखित नेपालमा सुरुङयुद्ध, ‘द लाप्चा’ (नेपाली र अंग्रेजी), रेडियो पत्रकारितालगायतका पुस्तक प्रकाशित छन् ।

उप्रेती पत्रकारितासँगै शिक्षण पेसामासमेत आबद्ध छन् । उनी इटहरीस्थित जनता बहुमुखी क्याम्पसमा समाजशास्त्र तथा मानवशास्त्रमा उपप्राध्यापकका रूपमा कार्यरत छन् ।

सञ्चार तथा सामाजिक विषयमा अध्यापनसँगै पत्रकारितामा समेत सक्रिय रहँदै आएका उप्रेतीले टाकुरा न्यूजमा यसअघि विभिन्न विषयमा विचार लेख्दै आएका थिए ।

मानविकी तथा सामाजिक शास्त्रमा स्नातकोत्तर उत्तीर्ण गरेका उप्रेतीको शैक्षिक पृष्ठभूमि तथा पत्रकारिता अनुभवलाई टाकुरा न्यूजको सम्पादकीय कार्यमा उपयोग गर्ने अपेक्षा गरिएको छ ।

सञ्चार क्षेत्रमा आएको परिवर्तनसँगै डिजिटल पत्रकारिताको विकास र पाठकको बदलिँदो रुचिअनुसार समाचार सामग्रीलाई थप प्रभावकारी बनाउने चुनौती अहिले सञ्चारमाध्यमसामु रहेको छ ।

सम्पादकको जिम्मेवारी पाएसँगै उप्रेतीले टाकुरा न्यूजको समाचार उत्पादन, सम्पादन, विषय छनोट तथा सम्पादकीय नीतिलाई थप व्यवस्थित बनाउने बताएका छन् ।

विशेषगरी स्थानीय तथा प्रदेशस्तरका विषयलाई प्राथमिकताका साथ उठाउँदै तथ्यमा आधारित, विश्वसनीय र जिम्मेवार पत्रकारितालाई बलियो बनाउनेतर्फ उनको भूमिका रहने उनले बताए ।

टाकुरा न्यूजले विशेषगरी पूर्वी नेपालको स्थानीय मुद्दा, सामाजिक सरोकार, शिक्षा, स्वास्थ्य, पर्यटन, कृषि, वातावरण, विकास निर्माण तथा समसामयिक राजनीतिक विषयमा केन्द्रित हुँदै आएको छ ।

नयाँ सम्पादकीय नेतृत्वसँगै टाकुरा न्यूजले समाचारको गुणस्तर, प्रस्तुति र विश्वसनीयतालाई थप प्राथमिकता दिने जनाएको छ ।

डिजिटल पत्रकारितामा बढ्दो प्रतिस्पर्धाबीच पाठकलाई छिटो समाचार दिने मात्र नभई तथ्य, सन्दर्भ र खोजमूलक सामग्रीलाई प्राथमिकता दिने लक्ष्यसहित सम्पादकीय टिमलाई अघि बढाउने तयारी गरिएको छ ।

डिजिटल सञ्चारमाध्यमको विस्तारसँगै समाचारको विश्वसनीयता कायम राख्नु, गलत सूचना र अफवाहबाट जोगिनु तथा स्थानीय आवाजलाई प्राथमिकताका साथ सार्वजनिक बहसमा ल्याउनु सम्पादकीय नेतृत्वका महत्वपूर्ण जिम्मेवारीका रूपमा देखिएका छन् ।